掃呢頁CODE去手機

2014年2月7日 星期五

[忽然1周 967] 雯女幫手搞移民 栢芝新加坡讀書洗底 雯女,張栢芝,栢芝,鄧萃雯,MW,




唔經唔覺, Lucas已經 6歲, Quintus都有 3歲,依家終於可以定落嚟好好讀書,希望 33歲嘅栢芝真係修心養性啦。

媽咪姐

雯女幫手搞移民 栢芝新加坡讀書洗底

做女人難,做單親媽媽更難。湊住 Lucas同 Quintus兩個仔流離浪蕩嘅張栢芝,終於定落嚟,喺新加坡展開新生活。早前佢接受訪問時就旅遊大使上身,猛讚新加坡:「喺新加坡可以一直做運動,香港有冬天,我就做唔到……新加坡大牌檔好好食,表面上人哋以為我大使,但我一食到平嘢就好興奮。」

湊完兩個仔返學後,栢芝除咗定期返國立大學外,仲頻頻到畫室學畫畫,洗滌一下心靈。

興奮還興奮,但人生路不熟,加上新加坡教育制度嚴謹,有錢唔一定代表可以直入名校。無助一刻,救星出現!近年成為栢芝閨密嘅鄧萃雯,眼見好姊妹有難即刻動用自己人際網絡,叫當地一眾教友幫栢芝處理移民事務,兼幫佢兩個仔搵學校。人多好辦事, Lucas同 Quintus入學問題迎刃而解。

依家兩個仔終於入到當地「加拿大國際學校」,做阿媽嘅,都係時候為自己前途諗嚇。栢芝為一洗頹氣重建形象,除咗喺新加坡經常高調做義工,媽咪姐收到風,佢最近仲報讀咗新加坡國立大學嘅社會科學系短期課程㖭。

所有嘢都塵埃落定,原本栢芝會帶埋兩個仔回港過年,俾四哥、拉姑見嚇兩粒乖孫。不過栢芝怕被跟,又臨時縮沙,但就邀請佢哋飛去新加坡探孫,搞到拉姑心花怒放。婆媳關係緩和,難怪霆鋒近日心情靚絕,笑曬口買雪茄啦!

栢芝報讀「新加坡國立大學」短期課程後,經常喺大學蒲頭,唔少大學生集完郵後,仲喺微博留言話喺飯堂撞到栢芝嘅機會率相當高。大學總共有 26個飯堂,栢芝經常流連嘅係全校面積最大嗰個,猶如美食廣場。

大學多星讀

媽咪姐早前去國立大學行一轉,發現環境相當好,面向海之餘仲有大草地。而栢芝所讀嘅短期課程,為期半年,每星期上兩粒鐘,非常舒服。有教授同媽咪姐講:「我哋大學經常有名人入讀,最近亦有香港明星申請。」

囝囝學費 16萬

Lucas同 Quintus入讀嘅加拿大國際學校屬區內有名私校,佔地十萬呎,設有八幢校舍,有戶外遊泳池等設施。每人每年學費約港幣 16萬,雜費另計。

謝家小兄弟性格開朗活潑,應該好快適應新生活。

雯女飛去拜年

雯女(左)同栢芝姊妹情深,今個農曆年,雯女特登飛去新加坡探栢芝,仲約埋鄭明明一齊拜年。

上年 8月,雯女到溫哥華講見證,就住喺栢芝嘅古堡寓所。事後栢芝直認:「我鍾意加拿大,買咗堡壘用嚟養老。雯女喺加拿大做基督徒見證嘅時候,嚟我屋企飲蘑菇湯。」

拉姑四哥鬆曬

栢芝決定唔移居溫哥華,改到距離香港三粒鐘機程嘅新加坡,拉姑同四哥當然放下心頭大石。四哥同媽咪姐講:「有得見啲孫仔梗係開心啦!栢芝去讀書,好呀!」

霆鋒嘆雪茄

栢芝搞掂兩個仔嘅入學問題,霆鋒一身鬆曬。上月尾,媽咪姐就發現佢去銅鑼灣買雪茄,喺舖內不時同女職員冧笑。之後佢一發現記者立即 chok番曬,性格嚟嘅!



鍾意就快D Share啦!