掃呢頁CODE去手機

2014年2月14日 星期五

[忽然1周 968] 好命女神 全智賢 全智賢,MW,




一直說全智賢係天然美女,但上星期一個韓網選舉「 10大零整容女星」,佢竟然冇入榜,網友則質疑該網站可信度。

亞熱帶

好命女神 全智賢

日前韓國財經網公開演藝圈物業王、憑電視劇《來自星星的你》爆紅嘅全智賢,以擁有最高價物業(港幣 7,340萬)上榜,排名第 7,亦係演藝界唯一一個女藝人打入十大。

全智賢 12年跟韓國超級富豪崔俊赫結婚後,除繼續其演藝事業外,亦懂得買磚頭保值,先後買入位於論蜆洞及二村洞小型大廈作投資。嫁個有錢人,事業又有成、投資更有道,全智賢條命真係好到冇朋友!

話全智賢好命,唔係吹㗎!係有根有據。

全智賢出道時,先後演出過《雛菊》及電影《我的野蠻女友》,《我》令她紅遍亞洲。雖然之後嘅《野蠻師姐》、《雪花秘扇》及跟國際合作嘅《最後的吸血鬼獵人》成績及口碑平平,但佢好醒目,隨即暫停演藝活動專注拍廣告, keep住曝光率。

直到 12年, 33歲嘅全智賢跟同齡喺韓國有「顯赫家族」之稱、本身又係韓國金融才俊嘅崔俊赫結婚,婚後即接拍電影《盜賊門》,冇諗到此片令其喺演藝圈翻生。

全智賢持有位於二村洞嘅物業,屬日本人聚居地,租金絕不便宜。

全智賢與華語圈藝人相當稔熟,跟任達華因合拍《盜賊門》而成老友;上月中到上海出席品牌活動時,跟李冰冰(左)被傳媒激讚為「中、韓女神」。

奶奶錫自由度大

嫁入豪門嘅全智賢,唔止老公錫,連夫家兩代長輩都冧得掂,先係奶奶「時裝設計師」李正宇對佢寵愛萬千,連奶奶嘅母親即「傳統韓服設計家」李英熙亦錫到佢燶。比香港一啲同樣嫁入豪門富戶嘅女星好命百倍,事關崔家雖貴為超級豪門,卻對全智賢嘅演藝事業給予無限自由,劇照接、廣告照拍。

13年尾,全智賢再接拍劇集《來自星星的你》,係佢 1999年《 Happy Together》後重返公仔箱之作,估唔到劇集成為韓國神劇,飾演神化女主角千頌伊嘅全智賢憑此劇令事業再次登頂。

全智賢同老公崔俊赫(左)乃青梅竹馬,而崔俊赫亦屬花美男一族,堪稱「(財)才貌雙全」。

全智賢十分懂得𠱁老人家,喺崔俊赫外婆「傳統韓服設計家」李英熙生日時,就親手做咗個芭比娃娃蛋糕(右上)𠱁老人家。咁識做,難怪得到夫家上下愛錫。

再拍名導闖高峰

據《來自星星的你》劇組表示,劇集可能會加多一集,但就要睇兩位主角金秀賢和全智賢檔期,因為兩人自《來》後,廣告、電影及劇集接到手軟。據全智賢經理人透露,「全智賢拍完《來自星星的你》後,可能會拍崔東勛導演嘅電影《暗殺》。因為崔東勛乃《盜賊門》導演,令她有信心靠崔東勛再闖第二個高峰,所以接拍成數很高。」

近日佢老公崔俊赫嘅外婆李英熙正在設計「嬰孩韓服」,於是人人都估係全智賢有咗。但全智賢就斷然否認。都係嘅,冇理由唔趁旺勢玩多幾年咁蠢,生 B?來日方長啦,係咪!

《來自星星的你》令雙賢火爆亞洲,據聞無綫收費台以天價買咗播映權,並諗盡辦法請雙賢嚟港。星星迷就拭目以待啦!

全智賢跟車太賢合作嘅《我的野蠻女友》,因一反韓國女性千依百順傳統,而大受歡迎,亦令全智賢憑此片打響亞洲知名度。

喺電影《盜賊門》入面,全智賢首演動作片,飾演亞洲十盜之一嘅鋼絲高手。

全智賢因演《盜賊門》而令其喺演藝界再登高峰,故對《盜》導演崔東勛(右)心存感激,並視為恩師。



鍾意就快D Share啦!