【短片】【首席智囊發功】陳志雲辭任商台CEO多搞作 搵張栢芝開咪
2014-02-11 18:18:00
「志雲大師」陳志雲今朝喺商台團拜自爆唔撈行政總裁個位，至於行政總裁個位就會懸空，而行政嘢會交比總經理陳靜嫻接手，自己就轉做「首席智囊」，化身「智囊大師」跑在最前線喎。
不過咁，轉Post之前大師已經安排好一連串新節目，所以佢會繼續幕前發聲。志雲大師又話新職位最大嘅挑戰，其實係每一日都要淩晨4點半起身。
至勁嘅係，智囊大師表示已請到近排成日喺新加坡踩滑板﹑畫畫及做義工嘅張栢芝，加埋佢化妝師老友Rick Chin喺《大龍鳳》開咪，仲話栢芝已經錄咗好幾集節目。至於栢芝會唔會返香港，喺錄音室直接做節目？陳生話遲啲先再決定喎。
另外，志雲大師表示嚟緊商台55周年台慶，會有一系列政、商同娛樂圈人物訪問，好似商台老闆何佐芝，高層俞琤（YT）、仲話希望搵埋何家大小姐超瓊同YT一齊做訪問，當然唔少得仲有佢舊老闆方逸華，同埋TVB新主人陳國強等等喎。
陳志雲轉做首席智囊後，已經搞作多多，原來佢成功搵到張栢芝開咪，仲爆栢芝已經錄咗幾集。
栢芝0依家喺新加坡生活寫意。（微博圖片）
陳志雲表示已將行政事項，交畀總經理陳靜嫻（左）接手。（攝影：葉君海）
|
鍾意就快D Share啦！
|
|
|
