馮仁昭四圍超：DaDa負傷拍追車戲 - 馮仁昭
陳靜（DaDa）前幾日同朋友開P，唔小心撞爆額頭，縫咗13針。噚日朝早DaDa喺大埔烏蛟騰為電影《Z風暴》開工，同古天樂喺氣溫只得8度下拍攝一場追車戲，見佢哋坐喺私家車後座，拍到左搖右擺，有啲牙煙，導演亦走上山頭作多角度拍攝，拍咗成五、六個take。
DaDa個額頭用棉花同膠布遮住，問佢驚唔驚拍追車戲整親？佢話：「唔怕，𠵱家唔痛，冇乜大礙，不過朋友仲慘，撞甩牙冇保險賠。」佢話事先有通知劇組整親，但唔使減危險戲，不過之後都有啲追殺戲。講到新年就周身傷，DaDa笑話當「紅」運當頭，會正面去諗。DaDa又話第一次同古仔合作，覺得佢好nice，古仔都有問候佢，講到古仔係城中筍盤，會唔會積極啲？佢笑話：「係咩？積極啲做戲，嗰啲唔諗。」
■DaDa指住自己縫咗13針嘅傷口，重述受傷經過，依然講得眉飛色舞。
古仔叫君如宴客
古天樂戲中飾演ICAC保護DaDa，問佢有冇就住受傷嘅DaDa？佢笑話：「佢真係犀利，個頭撞甩人哋隻牙。」古仔話吳君如嘅《金雞sss》票房咁好，都會叫君如搞慶功請食飯。古仔憑《掃毒》入圍金像獎，佢話：「入圍已係肯定，我對佢哋個個都有信心，係對自己冇，都係平常心。」同場仲有張松枝、歐錦棠同埋曾國祥，張松枝話今次演古仔手下。
撰文：馮仁昭
■古天樂同DaDa坐後座拍追車鏡頭，無驚又無險。
|
鍾意就快D Share啦！
|
|
|
