上週六（ 1日）， Exo-M 6個靚仔踩入旺角西洋菜街搞簽名會，雖然店外超過 3千 fans，迫爆成條街，但無阻 6子見 fans嘅興致，尤其中國籍成員 Tao，不停笑住口同 fans簽名，抵佢哋咁受歡迎。
FBI
襲港 12小時旺角淪陷 Exo被 fans偷 boxer
《星星》熱潮仍未退，上週六（ 1日）又有另一股韓潮襲港，就係韓國爆紅男子組合 Exo-M旋風式來港。 Exo-M六位成員都咁靚仔， FBI追星追足成日。
6個靚仔由機場落機開始，已有過千 fans接機，先迫爆入境大堂。講到最誇張，梗係 6子踩入旺角鬧市出席韓國護膚品店 Nature Republic搞嘅簽名會時嘅墟冚情況。原來大會只派 100個籌，但吸引超過 3千粉絲塞滿店鋪所在嘅西洋菜街，雖然 6子只逗留 30分鐘，但都搞到 Nature Republic附近四間鋪頭提早拉閘做唔到生意，其間更有港女不適要 call白車送院，總之亂到七彩。
留港大約 12個鐘，去到夜晚， 6子搭飛機返韓國時，一樣有幾千粉絲送行，情況混亂。
香港粉絲雖然瘋狂，但仍未及「韓飯」咁癲，最近 SBS電視節目《好奇的故事 Y》就爆料，曾有 Exo粉絲唔只曾偷入 Exo成員入住嘅宿舍，仲偷走佢哋嘅內衣褲放上網出售；而且更有偶像明星曾帶粉絲送嘅熊公仔入機場，最後被金屬探測器發現有攝錄機，橋段咁似《來自星星的你》嘅？
去簽名會前， Exo-M 6子先同香港傳媒打個招呼，佢哋話好開心來香港同 fans見面。之後有記者指出中國籍成員 Tao嘅黑眼圈好嚴重，但 Tao冇嬲不特止，仲講笑以普通話講：「這是臥蠶妝，是潮流。」引起全場大笑。
|
鍾意就快D Share啦！
|
|
|
