掃呢頁CODE去手機

2014年4月18日 星期五

[忽然1周 977] 宜家傢俬當影樓 模媽 Mia淘寶網賣衫 Mia,陳靜儀,MW,




大個價錢牌

慳皮 Mia在宜家傢俬影相 sell衫,貪多靚景。可惜百密一疏,衣櫃掛了大大個價錢牌,認真肉酸。

娛樂喧

宜家傢俬當影樓 模媽 Mia淘寶網賣衫

寫真熱潮減退,不少曾經哄動一時的𡃁模,紛紛轉戰內地登台賣肉吸金。 11年自爆結過婚生過仔,挾著「模媽」之名出道的 Mia(陳靜儀),近年主力北上打碟養家外,原來亦靜靜雞賣衫。

本刊發現 Mia在淘寶網開設網上商店,主力 sell韓風女裝,一件套裝賣二百幾蚊人仔,都算揦脷。有 model經驗的 Mia,更做埋人肉生招牌,示範新衫。但騎呢的是, Mia竟然喺宜家傢俬取景,連宜家價錢牌都見埋㖭。











模媽 Mia在淘寶網開的網店叫「 MIAC」。她強調所賣的衫,都由韓國空運抵港,絕無假貨。由於她聲稱件件正品,所以定價相對較高,普通一件印上字母的衞衣,開價 248蚊人仔,連埋運費的話,要三百蚊港幣才有交易。可能網店只開了一個月,所以銷售成績一般,大部分衫只賣出一件起兩件止。

上牀任影

為了吸客, Mia索性在睡牀取景。她穿上迷你裙,腳夾夾大擺誘人甫士。

出埋大廳

玩睡房誘惑都未夠, Mia去埋客廳影相 sell新裝,當正宜家傢俬係自己屋企一樣,不過右下角的宜家招牌就非常礙眼。

無人問津

Mia的網店只有 12款產品,不過價錢唔算平,其中這款字母衞衣從未發市。銷情似乎麻麻。

幫家人探路

曾在書展出招搶風頭的 Mia,深明宣傳之道。為谷網店生意,她當然自動波做埋生招牌,將貨逐件著上身,狂擺甫士影相。不過細心一睇,發現 Mia取景地點十分騎呢,竟然揀了宜家傢俬當影樓,擺明貪有大量家居場景,可慳一筆租 studio費用。雖然 Mia食腦諗縮數,不過她就唔記得執走傢俬價錢牌。

Mia屋企人一直搞開時裝生意,在大埔、馬鞍山等新界地區有不少分店。今次突然發展網店,亦是 Mia的主意。知情人士說:「網購係大勢所趨,但如果 build up一個網站要幾十萬,每個月皮費頗重, Mia根本冇呢個本事。所以佢寧願喺淘寶寄賣,請個客戶服務員答顧客問題,一來,年費只係幾千蚊;二來,售後服務亦可作賣點,可以箍到批客。佢覺得自己叫做有啲知名度,咪做埋 model囉,啲相都係搵手機影㗎咋,成嚿嘢唔使點使錢。」

今年 26歲的 Mia與前夫育有一仔一女,依家獨力養家的她,除了賣肉拍寫真,又試過黐富二代,用盡方法搵錢。《 Face》圖片

Mia:

lifestyle攝影風格

對於在宜家傢俬取景, Mia解釋:「其實自己啲衫都係 casual韓風,所以襯番啲 lifestyle嘅攝影風格。依家好多人都喺影樓影,我想成件事特別啲,揀咗喺宜家傢俬度影囉!(影咗幾耐?)我另外有部分衫喺 coffee shop度影,加埋影咗三個鐘,自己做開 model影開寫真,所以都好順利喎,冇俾工作人員趕。(俾人覺得好簡陋喎?)唔……呢個網店都係啱啱先 set up,好多嘢都要慢慢改善!」

膠面賣 mask

做過啪針豐唇手術變臉的 Mia,在網店亦賣埋韓國製面膜,不過一盒賣成 380蚊人仔,的確好貴。

用家點睇

Mia賣的韓國製面膜,算是最暢銷產品,不過用家評價好壞參半。

情史多多的 Mia,擇偶對象甚廣,試過與錢景峰拍拖半年。之後更與周秀娜前度 Avis、深圳富二代陳俊宇傳出緋聞(圖)。

前夫莊家傑與盛女 Whitney結婚生仔, Mia即在微博寸爆贈興,之後她反被二人夾擊,指她整容又偷食。

放蛇買衫

你只要有一個淘寶網賬戶,就可以免費在淘寶網平台開設專屬網店。不過開網店需要完成以下步驟:第一,要有支付寶(類似繳費靈)及身份證認證;第二,需要進行在線考試,了解開店準則;最後要寫上網店資料如貨品目錄等,唔算複雜。

為求了解 Mia網店的服務,記者於 3月 28日以顧客身份嘗試幫襯,買一件 Mia身穿、價值人民幣 128元的衞衣(上圖)。

等半日先覆

記者幫襯前先向網店客戶服務員查詢衞衣尺碼,雖然網店標明衞衣是 free size,但客戶服務員則留言指有大、中、細三個 size。之後,記者再追問可否選用其他速遞公司送貨。一般情況下,客戶服務員會在兩小時內回覆,但記者足足等了 12個鐘才收到回覆。

拒提供意見

記者連續多日也叫客戶服務員提供配搭方法,即使客戶服務員不想提供資料,理應有一個官方回覆,但 Mia客戶服務員卻視而不見,全程冇回覆,最後記者索性取消交易。記者就此事向 Mia了解,她說:「我請咗個客服幫我答,等我了解下先。」

名人也淘寶

03年由阿里巴巴創立的淘寶網,是全中國最大兼最安全的交易平台,現時會員人數以億計。由於網站有完善團隊管理,吸引不少藝人和名人也在淘寶網開戶做生意。

劉嘉玲賣名牌

一向投資有道的劉嘉玲,兩年前在淘寶網開店,專賣二手名牌衫。由於大部分名牌衫只穿過一次,而且價錢合理,如 Chanel牛仔布高踭鞋只賣千多元。加上附有劉嘉玲親身示範的相片,吸引不少網友幫襯,亦帶起藝人到淘寶網開店的潮流。

麥玲玲賣風水飾物

玄學家麥玲玲向來食腦, 12年初便嘗試製造二千件化太歲飾物,放上淘寶網小試牛刀,點知不到十分鐘便沽清。她為了應付一批海外顧客,決定另起爐灶,自資開網店,結果月賺 50萬,十分成功。



鍾意就快D Share啦!