容光煥發
黎姿偕助手到中環新店打點，當天她身穿西裝外套。內著招牌「白恤衫」，看上去春風滿面，明艷照人。
娛樂喧
中環新店趕工 黎姿為細佬擴充美容王國
黎姿（ Gigi）胞弟黎嬰 07年因發生亡命車禍後重創，黎姿全力接管弟弟在銅鑼灣的美容診所生意，幾年間搞得有聲有色，更一直計劃進軍內地及海外市場。
近年黎嬰病情好轉，為圓弟弟的美容王國夢，近日黎姿積極擴充美容院業務，更秘密在中環雪廠街開三千呎分店，好讓細佬全面康復後重掌大權。本刊日前目睹黎姿幾乎每天都到新店，𥄫實裝修工人趕工。原打算為老公馬廷強追仔的她，亦因新店事務疲於奔命，暫時煞停造人大計。
𥄫實新舖進度
每天忙於湊女外，最令黎姿心力交瘁的，便是打理弟弟於 05年創辦、在銅鑼灣開設的美容診所 CosMax。據知在黎嬰出事後，診所一班闊太熟客一度退款走人，公司曾裁員「止血」。黎姿當日挺身幫弟弟渡難關，除日日返診所主持大局和睇住盤數，又高薪聘請多位名醫駐診，加埋有自己做生招牌，幾年間搞到有聲有色，由原本僅千呎的診所擴充至近 7千呎，現時平均每月營業額估計逾 300萬。
本刊收到消息，雄心壯志的黎姿，近日窺準內地豪客生意，積極拓展業務，更選址在中環雪廠街甲級商廈開分店。據知分店已裝修得七七八八，望能趕及五一長假期開張。上周，記者連日目睹黎姿湊完女後，都會現身新店跟進裝修事宜。上周二（ 8日），她在新舖由下午五點逗留至晚上八點，才乘七人車返中半山騰皇居寓所休息。翌日午飯後，女鐵人又出動到上址𥄫實工人裝修，她足足逗留了 5個鐘，其間曾到附近餐廳醫肚，食飽後繼續返舖頭打點。當她離開時，記者上前欲與她做訪問，但她即急步上七人車離開。
黎嬰逐漸康復
黎姿開分店的目的，全為弟弟鋪路。 07年黎嬰車禍重創險變植物人，早年一直住在麥理浩復康療養院由專人照顧。近年他情況好轉，面部可鬱動之餘，亦由最初只講到單字，到現時可連續講說話，去年他更搬回家與父母同住。知情人透露：「 Gigi對 Stephen（黎嬰）真係無微不至。今次開分店， Gigi就同老公商量，最後攞咗 500萬出嚟搞。除咗錢之外， Gigi周不時會同 Stephen傾偈，每次講到診所生意， Stephen都會好大反應， Gigi知細佬心裏面仲有團火，梗希望幫佢圓夢，等佢好番可以接手，遲啲新舖開張， Gigi都會帶細佬去睇嚇。」
煞停追仔大計
新舖面積達 3千呎，因在中環甲級商廈地段，故每月租金高達 40萬，比起羅素街的舖面雖然少足足 4千呎，但租金卻貴 10萬。據聞黎姿為新店引進大量外國高級美容儀器，以吸納有錢闊太族。
42歲黎姿為新店忙到一頭煙，雖然早前曾傳她為追慈姑椗，在醫院秘密注射超級排卵針，可惜至今一直未有消息。據知她與老公馬廷強已有共識，暫時煞停生育計劃。知情人續說：「 Gigi同 Patrick（馬廷強）都知呢兩年唔搏，機會會愈嚟愈細， Patrick係大戶人家，講到底都希望有人繼後香燈，不過生仔講緣份， Gigi依家一心諗住開咗新店先算， Patrick咁錫老婆，乜都聽曬老婆話」
中西合璧救細佬
未嫁前，揹起成頭家的黎姿，與弟黎嬰感情至深，為供細佬到英國讀書，及返港開美容診所，她死做爛做搏到盡。直至細佬發生意外後，更退出娛圈，並求遍中西神佛，為細佬仆心仆命。
貴州起學校
08年尾黎姿到貴州山區探訪小朋友，更以弟弟名義興建學校，積福積德。
|
鍾意就快D Share啦！
|
|
|
