探熱針
栢芝復出 霆鋒主動幫
同謝霆鋒離婚後，一度帶住兩個仔 Lucas和 Quintus遠走溫哥華的張栢芝，去年終於決定移居新加坡，並安排小朋友在當地升學。以為一切安頓，兩兄弟唔使再做逃學威龍，跟住阿媽做空中飛人，點知近日栢芝又「復出」返香港同大陸開工；兩兄弟冇人照顧，霆鋒於是主動幫手，安排囝囝返香港，由老豆接力，睇住先！
唔想任人擺布
唔想兩個仔 Lucas、 Quintus跟住阿媽張栢芝四圍飛的謝霆鋒，去年尾掟錢在新加坡買豪宅，安排兩子入讀國際學校，希望三母子在當地安頓
下來。
有前夫開水喉照顧，本來可以印印腳全職湊仔，但想到手停口停，隨時為此要任由前夫擺布，上月栢芝積極「復出」，為商台節目做嘉賓主持接品牌活動，又到內地錄影綜藝節目《媽媽咪呀》及《最強大腦》，短短半個月，有指她已進賬五百萬。
上週三（三月二十六日），栢芝返港出席完 MCM旗艦店活動，兩日後（二十八日）便孖住化妝師好友 Rick Chin到上海開工，臨走前，她將 Lucas及 Quintus送到霆鋒寶雲道寓所，由老豆代為照顧。
開咪寸前夫
難得「霸曬」兩個寶貝仔，謝霆鋒全天候做廿四孝老豆。週日（三十日），有人發現霆鋒帶住兩個仔現身跑馬地賽馬會會所，三父子一齊開飯天倫樂。
「霆鋒唔想兩個仔跟住媽咪返大陸做嘢，所以主動提出幫手，其實過兩日栢芝做完嘢返香港，又輪到霆鋒飛，佢要去意大利同 Eason拍《十二道鋒味》。兩個仔嘅學校假期又就快完，三母子都趕得切返新加坡開學，不過成日咁樣飛嚟飛去，兩個小朋友都好辛苦。」霆鋒身邊人說。
栢芝同霆鋒雖然有偈傾，但撐好友 Rick Chin開咪，幫電台節目《起來！大龍鳳》擔任嘉賓主持的她，仍不忘暗寸前夫離婚玩逃避。
「男人鍾意逃避，唔想做負心漢，其實一早想走，但唔會講，等女人講，等你喺屋企爆發……我知道佢要呃你，就唔會講真話，我會自己走……如果雙方唔係向同一方向走，點遷就都冇用。」
各施各法
11年，鋒芝正式宣布離婚，一直同拉姑關係惡劣的栢芝，經常出招阻止嫲孫見面，為幫阿媽出頭，霆鋒亦諗盡計仔，同前妻各施各法。
見面要申請
離婚後，一對囝囝同栢芝生活，有傳拉姑要向前媳婦申請先有得見孫仔，令嫲孫關係疏離。
定居新加坡
拉姑四圍哭訴冇得見兩粒孫，居中的霆鋒，唯有諗盡方法氹番前妻，用錢換話事權，主動加碼生活費外，更在新加坡買下市值三千萬港元豪宅，安排三母子在當地生活。
|
鍾意就快D Share啦！
|
|
|
