熱爆娛樂: [FACE 361] 小器　〈囍帖街〉冇得唱　 Eric Kwok飛起謝安琪謝安琪,MF,

2014年4月23日星期三

[FACE 361] 小器　〈囍帖街〉冇得唱　 Eric Kwok飛起謝安琪謝安琪,MF,

〈囍帖街〉將 Kay的事業推上高峰，可惜 Eric作品展，佢始終無緣上台。

真面目

小器　〈囍帖街〉冇得唱　 Eric Kwok飛起謝安琪

08年由 Eric Kwok及黃偉文創作的〈囍帖街〉為謝安琪（ Kay）贏過唔少獎項，謝安琪更因此成為天後。今時今日仲有唔少人唱 K都要唱呢首，識唱一定係唱〈囍帖街〉。

不過環球唱片將於 7月中為郭偉亮（ Eric Kwok）舉行個人作品展， Kay原本喺 Eric邀請之列，可惜因為 Kay跟舊東家環球不歡而散，小器環球勒令 Eric不能請 Kay出席，趕 Kay出紅館。

12年 Kay參加過 Wyman喺紅館舉行的作品展，當日一樣有唱由 Wyman填詞的〈囍帖街〉，台下反應熱烈。

出道 9年的謝安琪， 08年收穫特別多。先得到一首〈鍾無艷〉，年中再得到由 Eric Kwok作曲、 Wyman填詞的〈囍帖街〉，令 Kay於年尾頒獎禮上得到 12個獎項， Eric Kwok絕對要記一功。

開會刪名

7月 Eric Kwok即將舉行首個個人作品展，參與歌手位位都分量十足，而〈囍帖街〉主唱謝安琪當然在被邀之列，不過已跟環球解約的 Kay卻被飛起。「〈囍帖街〉咁 hit， Eric梗係想請 Kay嚟唱啦， Kay都應承咗啦，等於之前 Wyman個騷一樣之嘛，點知環球知道咗之後就反對，開會時仲將 Kay個名喺 rundown刪走咗！大家都知咩事啦， Eric都覺得好無奈。」知情者說。

被飛出局， Kay只好尊重大會安排，而週一（ 21日）其經理人夏森美就避重就輕回應本刊：「 Kay同 Eric一向都係好好朋友關係，好朋友開騷， Kay梗係想支持，但係藝人唔知自己時間表，我哋度過期嗰幾日真係有嘢做去唔到，不過 Kay都會用心支持 Eric嘅。」

環球有份主辦， Eric Kwok的音樂會將於 7月舉行，海報近日亦曝光，有 Eason、梁詠琪仲有梁漢文，不過就冇 Kay份。

08年 Eric Kwok同 Wyman寫畀 Kay的〈囍帖街〉令佢彈起成為天後，可惜今次 Kay去唔到 Eric Kwok作品展， fans又少咗一首正歌聽。《蘋果日報》圖片

06年簽約畀環球就一直同黃劍濤（左）合作，可惜 12年 Kay提前解約，並轉投金牌大風，令 Kay跟環球關係決裂。

堅持唔「維穩」

5月 1日係勞動節假期，當日澳門民政署亦舉行《黑沙海灘迎夏日演唱會》，更邀請咗唔少香港歌手出席，當中以張智霖同謝安琪最紅，門票亦已賣得七七八八，其中大部分歌手都會「畀面」出席。不過由於個騷有「維穩」之嫌，被邀請兼印埋海報的謝安琪、 C AllStar同埋 RubberBand已決定唔去。 Kay經理人夏森美仲話：「如果有啲騷主辦目的為維穩，我唔會答應歌手參與。」天地有正氣！好彩香港樂壇仲有安琪！