全城熱爆的娛樂八封新聞 & 時事趣聞 & 生活 + 趣聞
遠望型英帥 吳啓華話自己兩年前打乞嗤見血，以為生癌（後尾先知係鼻竇炎），所以戒咗煙，肥咗唔少。但遠睇唔覺喎，仲好玉樹臨風。
呢期咁興美魔女，咁係咪應該都整番個美魔男選舉呢？ Well，據媽咪姐班靚太 friend嘅小圈子公開記名投票，「永遠的程至美醫生」吳啓華絕對係眾望所歸，魔男首選！ 正所謂有圖有真相，早幾日媽咪姐特登去會一會吳啓華真身，發現無論遠觀 total look定近望肌齡髮線，佢都係鬼咁瀟灑零膠味。下個月就 50嘞，仲可以 keep得咁 fit，又難怪李若彤嘅劇中老公鄭丹瑞，咁驚老婆同吳啓華舊情復熾嘅！
近望冇派膠 吳生又話：「我睇劇諗到呢個月 19號生日踏入 50歲，年紀開始大，要注重身體健康。」嗯，笑嗰陣係有啲紋，但皮膚真係算滑淨，又無膠味，成塊面都識鬱㗎。 Thanks God！
查實吳啓華近年北上賺埋唔少，手上戴嗰隻就係瑞士十大名錶之一嘅蕭邦表，盛惠 6萬 8！
保鮮 26年 睇嚇 88年吳啓華同王祖賢嘅《畫中仙》劇照。 26年後， 49歲嘅男方唔覺殘，仲有味道咗，但 47歲嘅王祖賢已經……
