2014年5月9日 星期五

[忽然1周 980] 湯佬無限 loop救世 湯佬,湯告魯斯,MW,




51歲嘅湯佬聲勢不復當年勇, 2005年《強戰世界》,美國本土收 2億 3千萬美元;家下作品平均只得 8千萬美金左右。今次《異空戰士》劇情 OK,希望可以幫佢東山再起

歐洋風

湯佬無限 loop救世

湯告魯斯又返嚟

一年一度新作《異空戰士》,講未來世界被異形入侵,身為士兵之一嘅湯佬雖然戰死沙場,但離奇跌入時空循環,無限復活無限 loop,務求拯救人類。

放心喎,此無限 loop不同彼無限 loop,絕對唔似亞視局你「環保」嘅!

講真,湯告魯斯( Tom Cruise)真係人氣不再喇! 2010年《戀戰特務王》、 2012年《烈探狙擊》,以至前作《攻.元 2077》,口碑、票房都一般般,新作《異空戰士》,憑咩吸睛?

硬資料式話你知,製作成本高達 1億 1千萬美金,由《叛諜追擊》導演德格里文( Doug Liman)執導。不過講到天花龍鳳都冇用,君不見《西遊記》乜乜班底,又話投資幾多億,結果咪俾網民恥笑!講到底,乜嘢都係假,不如聽下古仔係咪你杯茶仲實際。

睇戲似打機

《異空戰士》改編自日本暢銷小說《 All You Need Is Kill》,劇情講外星異族入侵地球,零實戰經驗嘅湯佬突然被調到前線打仗,唔使諗,梗係即刻被秒殺 K.O.啦。不過唔知點解,湯佬唔單止冇死到,仲不斷重生,一次又一次經歷同一場戰爭。而每次翻生,湯佬總會學到新招式對付敵人,直至打贏外星人為止。

情節似打機過關,意念嶄新,而且《異空戰士》搶先於 5月 29日香港上映,比美國足足早咗成個禮拜,先睹為快點都好過睇 outdate咗三年嘅《西遊記》囉!

女主角由《穿 Prada的惡魔》嘅艾美莉賓特飾演。佢為咗演好軍官角色,刻意練大隻,你睇條手臂,勁過男人!

零戰鬥經驗嘅湯佬,戰死後意外墮入時空循環,不斷重生打同一場戰事,令佢戰鬥力大增,同打仗經驗豐富嘅艾美莉有得揮。

湯佬身上嘅機械戰衣重 120磅,加上連場動作,超辛苦。

電影早前喺香港搞發布會,記者睇過精華片段,特效真係靚,唔似得《西遊記》標榜嘅「荷里活水準」。

入侵地球嘅外星人(左),同我哋平日見嘅完全不一樣,似一箸粉絲多過乜。



鍾意就快D Share啦!