2014年6月27日 星期五

[忽然1周 987] 倫敦直擊 太陽娛樂 Paco出手 江若琳夠薑飛林小明 Paco,林小明,江若琳,黃柏高,MW,




8/6素顏返學

當地下午三時多,孭住背囊放學的江若琳一手攞水樽同 file離開學校。她一身打扮樸素,身上亦不見名牌。

滾熱辣

倫敦直擊 太陽娛樂 Paco出手 江若琳夠薑飛林小明

江若琳自與寰宇老闆林小明發生合約糾紛後,一直潛水唔見人,為避傳媒更寄居好友屋企。不過本刊收到消息,曾呻過十年來一毫子都冇落袋的她,本月初竟然秘密遠赴倫敦兩星期。

記者飛赴倫敦直擊,發現江若琳報讀了當地的短期課程,加埋機票食宿,使費至少十萬。

荷包忽然鬆動,皆因江若琳有猛人射住。據知她碼掂太陽娛樂話事人 Paco黃柏高,轉會成數相當高,難怪她有膽量飛起林小明。







近三年工作量不多的江若琳,一直認為寰宇未有盡力為她接 job,加上她聲言捱了多年零收入不特止,更爭落林小明一堆長命債,難怪去年尾已秘密向多間娛樂公司放風想轉會。太陽娛樂近期不停招兵買馬,掌舵人黃柏高( Paco)對睇得又演得的江若琳亦有興趣。

「江若琳有官司喺身,唔少公司都諗住睇定啲。 Paco答應幫佢搞掂單官司,又話可以開條新 line俾佢。不過 Paco話點都要俾面林小明,叫江若琳呢排低調啲。太陽娛樂咁有江湖地位,江若琳都信佢哋搞得掂官司。加上佢簽過長約之後,依家見過鬼都怕黑,所以搵緊律師睇合約,短期內會動筆簽。」知情者說。

秘赴外地洗底

有財雄勢大的新公司撐腰,難怪江若琳放心,早於今年 4月已有外遊打算。「江若琳講咗好耐想去英國,趁依家未有新工作,嗱嗱聲喺嗰邊報咗個短期 course,話要學好演技喎。佢形象一向麻麻,又同捧紅自己嘅寰宇嘈,今次佢咪當充實自己,兼轉公司之前洗底囉。佢知 Sherman(鍾舒漫)去過,仲專登問 Sherman取經。」

6月 7日下午 1點,江若琳由香港飛赴倫敦。在赤鱲角機場時,她一直戴住口罩,直至過關,才拉低口罩接受檢查,非常鬼祟。經過 13個小時機程,當地時間晚上 9點,江若琳抵達倫敦,落機後她明顯放鬆戒備,即時脫下口罩,而機場早有一名外籍司機等候。她吩咐司機在大笨鐘和海德公園遊一圈,之後才開往她們租住的 Circa Apartments休息。

黐實 Paco

今年 1月寰宇春茗時,江若琳一見到太陽娛樂掌舵人黃柏高( Paco),就主動走埋去密密斟。之後她在網上 post咗與 Paco的合照,唯獨不見林小明。

7/6神秘登機

在港登機前,江若琳一直戴口罩,只是在過海關時,才拉下口罩接受檢查。

司機接送

同日到埗倫敦後,有司機接送江若琳,她攞出地圖詢問司機旅遊景點。不過她租用的汽車是「錢七」,連司機一日租金都只是二千港元。就記者所見,江若琳亦只有在首日才僱用司機,平日都是徒步或乘地鐵。

遊學早出晚歸

翌日早上,江若琳到住所附近的學校上課,開始為期兩周的英文、演技及跳舞課程。下午 3點幾,孭住背囊、手揸細 file的江若琳放學,沒有即時返住所,反而搭地鐵,估計是把握時間遊覽倫敦。本刊記者在她的住所一直等到深夜,仍未見她回來。

江若琳居住的 Circa Apartments是住宅式公寓,位於倫敦市郊的平民區 Chalk Farm。江若琳租住一個千呎單位兩星期,租金為港幣二萬左右,兩星期學費大約港幣五萬,連同使費及機票,估計她兩星期花費十萬港幣。雖然唔算多,但對自稱十年冇收入的江若琳而言,都算離奇。

本刊致電鍾舒漫,她亦承認江若琳有搵佢取經:「江若琳有同我講去英國讀書,佢想學 acting,佢住嘅 apartment都係我介紹嘅。」

江若琳居住的住宅式公寓 Circa Apartments,位於倫敦市郊的平民區 Chalk Farm,鄰近地鐵站,平均每日租金為港幣千多元。

江避談轉會

本刊發現,一直愛玩 instagram的江若琳,出發前一日仍然有 post相片,更新狀況,不過就完全未有提及飛赴倫敦讀書一事。直至回港前三天,她才開始 post校園生活相以及上課用的英文劇本,留言「努力克服困難,我可以的」。沒有闡明自己身在英國讀書。

知情者說:「雖然家陣有 Paco幫手,但江若琳同林小明嘅合約糾紛仲未搞掂,唔敢透露去英國咁遠,費事有人以為佢有錢,又咬住佢唔放。」

6月 23日下午三時許,江若琳返港。出閘後,警覺性甚高的她四圍望,未幾一名中性打扮的女友人上前為她拎行李。記者上前詢問她近況,但她十問九唔應,更避談轉會一事,只強調自己係「一個普通嘅學生」。

記:記者江:江若琳

記:你之前話冇乜收入,去英國讀書唔平喎?

江:多謝關心! Thank you!我只係一個普通嘅學生。

記:點解會揀英國讀書?

江:我好眼瞓,唔講喇!

記:同林生單官司點呀?

江:唔講囉。

記:係咪會傾太陽娛樂呀?

江:咁得意,唔講喇!

江若琳避談,記者周三( 25日)就此事聯絡 Paco,但他依然唔想漏口風,只係話:「之前係有搵過江若琳拍戲,不過佢搞掂同林小明單官司先」明顯希望待江若琳和林小明合約糾紛淡化後,才將消息公布。

本刊詢問林小明,現時寰宇同江若琳是否有約?林小明話:「唔方便回應,總之進行緊法律程序。(有冇聽聞太陽娛樂簽佢?)呢啲嘢我唔想去猜測。(佢話冇錢,點解會有錢去英國讀書?)係佢話自己冇錢,我唔覺得係!」

23/6循環著衫

7/6粉藍背心

回港時,江若琳繼續戴口罩。當日她身穿的粉藍背心,和出發當日所穿是同一件。

21/6曬返學照

臨別秋波,江若琳自拍班房照,又曬旅行背包,大騷親民一面。

22/6英文劇本

返香港前三日,江若琳才陸續在微博大曬返學照片。呢張相她騷一騷英文劇本,又突出自己捱飯盒,「好學生」形象即時浮面。

女星愛遊學

唔少女星都會選擇出國遊學,課程通常為兩星期至三個月,英國同美國都係熱門地點。

鍾舒漫

早前去完一個月 LA加英國遊學返來的鍾舒漫,更順道在英國錄音。「我去 LA跟巨肺黑人 Natalie學唱歌運氣,佢係 Lady GaGa嘅和音,每天一早起身學習運氣,去英國就跟 Robbie William監製 Benny學寫歌。」

容祖兒

容祖兒曾多次遊學外國。去年 8月,容祖兒為演唱會,飛美國 LA修讀短期跳舞課程,每日跳 4至 5小時舞。 Joey仲用飛行里數換分俾劉浩龍,等呢個「跟得男友」可以每日揸車接送自己。

蔡依林

去年蔡依琳飛往英國遊學一個月,她上表演、音樂與舞蹈課,課餘亦有到倫敦著名景點一遊。看音樂劇《悲慘世界》時, Jolin更感觸落淚。

2千蚊學戲

去外國讀書有平貴之分,江若琳去英國讀 acting,就揀選了當地比較出名的 Sutara Academy of Performing。該校的賣點,是有不少當地現役演員擔任教師,為學生親身示範演技。該校的課程主要分十六歲以上及以下,十六歲以上的課程,會教授演技、動作及用聲等內容,每堂約港幣 2千元,好像江若琳學跳舞及演戲,就大約要學費五萬。

當地著名電視劇演員 Wil Johnson(前排中),亦是演技班導師之一。

大人、細路都可以去 Sutara Academy of Performing,該校在當地不乏宣傳。



鍾意就快D Share啦!