2014年6月23日星期一

基仔貼BB相準備展開人生另一頁？

2014-06-23 14:47:00

基仔貼咗張BB相，再配埋《我生》中歌詞。

古巨基同佢位得力助手女友Lorraine拍拖20年，有傳佢哋將於今年12月14日拉埋天窗，結束愛情長跑，雖然當事人一直冇承認此事，但從基仔近日為MOOV音樂APP全新嘅「LyricSnap!TM」功能中，就或多或少感受到，佢經已準備好開展人生新一頁。

令次新功能係將歌曲、歌詞同相片結合再分享，基仔揀咗歌曲《我生》中歌詞：「人其實怎麼長大怎麼懂性有那位必須尊敬為何要說話無權大聲只聽指令」，再配上佢自己BB相製成，基仔解釋：「歌曲係關於人嘅誕生，自己到咗某個年紀，慢慢累積咗經驗之後，會問『人生是什麼？』，見到身邊好多朋友都生咗小朋友，小生命嚟到世界，又會好奇『人生是什麼？』」基仔覺得呢個階段嘅感覺好奇妙。

另外同醫生男友感情穩定嘅官恩娜（Ella），就認為每個人生階段都值得去紀念，佢話：「如果我真係嫁得出，我會用揀彭羚的歌曲『給我愛過的男孩們』，歌詞係多謝曾經愛過自己的男孩，希望祝福自己找到真命天子，相就用自己結婚相啦。」