瘋傳C朗(左)唔會再畀囝囝(右)代表葡萄牙任何年齡級別國家隊。
C朗「出走」葡萄牙國家隊一事有新發展，根據英國《太陽報》等歐洲傳媒爆料，呢位41歲射手今次魯莽行為，已經違反葡萄牙足總規則，將面臨被罰禁止參加國際賽1至6個月及罰款。網上瘋傳C朗大反擊，勒令16歲囝囝「小C朗」唔再代表葡萄牙小國腳，跟隨繼母喬治娜做「阿根廷人」，將來為呢支南美洲勁旅披甲。
根據葡萄牙足總規則，任何國家隊球員擅自離隊，或者冇合理原因之下缺席訓練、比賽、球隊相關活動，將被處罰國家隊停賽1至6個月及罰款。葡萄牙出戰上場歐國聯作客丹麥前夕，C朗乘坐私人飛機離開，前往西班牙馬德里，足總會長柏度普安卡同領隊佐治捷西斯追到機場遊說，都留佢唔住，明顯已觸犯足總規則。葡萄牙傳媒民意調查顯示有75%人認為C朗應該為今次事件負責，足總有大條道理處罰呢位球王。
由於C朗做得太肉酸，就算足總唔處罰佢，相信主帥佐治捷西斯都唔會再徵召佢入伍，同罰國家隊停賽分別，葡萄牙早前歐國聯主場贏威爾斯1比0，可能成為C朗國家隊「告別戰」。
據悉C朗反枱走人，主因係佐治捷西斯原本答應佢，作客挪威一役後備上陣30分鐘，但最終並冇換佢入場，其後佐治捷西斯同意喺記者會向佢道歉，同樣冇發生，結果C朗憤然離隊。
另外，盛傳C朗不滿囝囝「小C朗」落選葡萄牙U16名單，加上自己「受委屈」，一次過怒火大爆發，網上瘋傳C朗唔會再畀囝囝代表葡萄牙任何年齡級別國家隊，甚至跟隨繼母喬治娜做「阿根廷人」。
不過，消息指根據國際足協規則，球員冇權以繼母國籍作為代表國家隊依據，「小C朗」冇資格成為阿根廷國腳，由於佢喺美國出世，如果唔代表葡萄牙，可以揀為美國披甲。
最強博彩盤路過關神器《串績王》：http://win.on.cc/football/
本文作轉載及備份之用 來源 source: http://hk.on.cc
|
鍾意就快D Share啦！
|
|
|
