張秀文遭強吻 狂迷趁亂胸襲
身在巴西直擊世界盃的幾位無綫女藝員先後遇胸襲，繼苟芸慧及陳貝兒被非禮後，前晚張秀文亦險遭「巨人」胸襲！當主辦國巴西淘汰智利後，全場high爆，一名踩高蹺球迷見到張秀文身穿巴西球衣興奮莫名，突施龍爪手摸胸，幸得高鈞賢及時阻止，場面險過剃頭！
面對熱情球迷，一眾擔任巴西直擊的靚女藝員如苟芸慧、陳貝兒、張秀文、鄧佩儀及靚仔藝員高鈞賢都連番遇險！早前苟芸慧先後兩次被外籍人士狼吻，陳貝兒及鄧佩儀曾遭胸襲，就連高鈞賢亦被女fans偷啜，認真慘情！
高鈞賢出手護花
最新的受害者輪到前港姐張秀文，昨日淩晨她與高鈞賢於米內羅球場直擊巴西對智利的十六強賽事，雙方苦戰120分鐘仍打和，最後巴西靠射贏12碼出線，贏得驚險，至於場外進行採訪的張秀文同樣驚險！贏波後全場陷入瘋狂狀態，球迷「見人就攬」高聲尖叫慶祝，混亂間張秀文被兩名球迷趁亂強行錫面，但她仍堅持繼續工作，並選擇訪問一名踩高蹺、支持巴西的外籍男士，該「巨人」見到秀文身穿巴西球衣，衫上更有2比1代表巴西贏波的數字，即high爆烏身伸出「龍爪手」，希望親手摸到該2字，而位置正好在張秀文右胸，險蝕曬底的秀文當時來不及反應，千鈞一髮之際，幸得身旁的高鈞賢出手阻止！
反應慢事後知驚
事後張秀文受訪時仍餘有猶悸：「好在高鈞賢出手，否則個球迷一定掂到我！（有冇驚到喊？）當時未識驚，以為佢想講賽果，之後我哋都即刻走，冇再訪問佢，但佢仲繼續追住我，嗰陣真係驚！（要學識保護自己？）高鈞賢都話我反應慢，話下次要企喺我隔籬做訪問，唔想被啲人胸襲。（點報答佢？）請咗佢飲汽水」高鈞賢則說：「好彩我都算係運動高手，出手出得切擋住佢，遲一秒都出事！」他又指很興奮能欣賞巴西球星尼馬顯腳法，大讚巴西隊好波。
至於TVB世界盃節目總監李漢源接受電話訪問，對於女藝人接二連三被非禮，他亦直呼驚險：「其實每組有五至六個人，工作人員會做埋保鏢，盡量安排女主持企中間，令外人唔能夠埋身，我同佢哋講，寧願拍唔到某啲片，都唔想有受傷或不愉快嘅事件。」
文：影視組
|
鍾意就快D Share啦！
|
|
|
