4月好腫
張可頤在《激活．空間大改造》中有專屬自己的環節，負責介紹香港舊區建築物。 4月頭首集介紹美荷樓時，張可頤仍然眼腫面腫。
真面目
嘥料 過有線冇人知 張可頤降呢拍奀星
前年由大台轉投香港電視的張可頤，因為港視開台無期無奈決定唔續約，去年 12月被迫回復自由身。
大台唔收留，港視未有前景，張可頤焗住接散 job，早前靜雞雞過有線做綜藝節目《激活．空間大改造》主持。貴為昔日視後，張可頤過檔後竟然要降呢與二打六做拍檔，反而該節目的前任女主持李佳芯（ Ali）轉會大台後即升呢成為新高登女神。
唔想愈做愈奀， 45歲張可頤真係要望王維基早日開到台，有得返去做一姐喇！
演技早達視後級數的張可頤， 12年拍完最後一齣大台劇《天梯》（最高收視 39點）後即投向魔童王維基，以 7倍天價人工、每集 14萬元與劉美君合拍新劇《客家女人》。以為執到寶，點知港視搞極都攞唔到牌，除了新劇冇得出街，魔童亦被迫暫停開劇，一代視後變相失業。
失業自由身
冇收入但係又孭住去年以 600萬買入的元朗四季豪園，要供樓惟有搵出路，曾被甲狀腺炎搞到口腫面腫的張可頤，靠積極做運動抗疾魔，至今年 4月，張可頤以自由身身分過檔有線，主持綜藝節目《激活．空間大改造》，負責介紹香港舊區建築。
空降收費台，一向同陳豪、羅嘉良等一線男星合作的張可頤冇得揀，焗住與奀主持、曾經在足球台講波的強尼及裝修師傅麥 Sir做拍檔，加上新節目由 4月播出至今甚少宣傳，連轉會頭炮都無聲無色。
大台永不錄用
留守有線谷唔起，張可頤又萌生走人念頭，據知她正與 nowTV傾合作，打算接拍旅遊節目，成為首個去勻全港 4個電視台的女藝人。
冇間做得長，其實張可頤轉投有線前，一度放風想重回 TVB，可惜有傳性格率直的張可頤多年來樹敵太多，拍《天梯》時唱陳茵媺靠黐陳豪爭戲份，又連高層曾勵珍都得罪埋，以致被列入黑名單，永不錄用！潮流興懷舊， 45歲一樣可以變美魔女，張可頤唔使灰喎！
拍檔冇人識
《空間大改造》做到第 4輯，主持換上另一奀人王曉君（右一），拍住舊人強尼（中）、麥 sir（左），三個都冇人識。《空 4》繼續講日本舊屋改建，呢一輯仲加埋張可頤介紹香港舊建築，豐富過大台以前套只講香港樓的《更上一層樓》。
走淨兩件
自從有線前高層余詠珊空降無綫做非戲劇製作部總監，即不斷挖角，繼成功將「第一代愛將」黃翠如同洪永城洗底變為 TVB人，余詠珊仍繼續搶人，除李佳芯 Ali，仲有衞志豪、陸浩明、莫家淦及丁子高舊愛譚凱琪（ Zoie）。走得就走，有線舊有娛樂女主持得番史澤雅同劉明軒，勢孤力弱，難怪要請外援救亡！
過檔大台
|
鍾意就快D Share啦！
|
|
|
