探熱針
廁格又嘔又錫 Coffee：冇性行為！
一場「殘廁 gathering」，女主角 Coffee（林芊妤）遭無綫重判死罪，變成失業大軍，而男主角上市公司達利國際集團有限公司 CEO林知譽（ Will），至今仍然龜縮。
獨自收拾殘局的 Coffee，在承受廁格風波的壓力下，重提經過及事後無面目見家人的心情，她幾度激動喊爆，聲淚俱下為廁格的過程解畫：「我冇喺廁所同人有性行為。」
遣散費二萬四
酒後失分寸負上代價，遭高層樂大媽（易玲）處決，但要養家的 Coffee還是選擇堅強面對。炒魷已成定局，茫茫前路。「我真係未有（打算），好失敗！會向瑜伽方向發展，反正發生呢件事之前我都踩咗半隻腳喺呢行。」 Coffee說。
被無綫處以極刑後，有指 Coffee獲公司大方看待，得到餘下的半年合約底薪作遣散。據了解，在無綫六年， Coffee底薪只得四千蚊，豪俾半年，合計二萬四。「幾多錢我唔講，總之係幾千蚊。不過我之前好勤力，所以成日爆騷。」
闖禍後，唯一令 Coffee啃唔落的罪名，是有公司高層借傳媒暗示她自製新聞炒作，對此耿耿於懷的她，一講就好激動。「冇人會拎自己前途、家人同貞操去較飛！」
提到 gathering對手， Coffee說：「當時我啱啱同前度（昔日無綫有米奀星潘宗揚）分手，係好努力忘記佢嘅時候阿 Will就出現，俾咗好多關心我，佢俾我第一個感覺係好正人君子。」
多謝傳媒刮料
Coffee口中的正人君子阿 Will，事後即潛水到杭州，留下女方獨自面對。
「講真，我係有唔開心！但我好明白佢嘅處境同屋企壓力，我冇怪佢。（你哋仲有冇聯絡？）仲有嘅，不過我想一個人冷靜嚇先。其實我好多謝傳媒幫我搵到佢咁多資料出嚟，原來佢係上市公司太子爺。我同佢約會，每次都係我自己搭車去約會地點，佢冇用車接送過，所以我冇 care過佢屋企係點，只知道佢好愛錫細佬妹，好孝順，家庭觀念同我相近。
「（呢一刻你仍然覺得佢好好？）係！就算身邊人講佢好多唔好嘅說話，我仍信我對呢個人嘅第一個感覺。」 Coffee努力地為對方辯護。
叫聲係自然反應
處處維護龜縮阿 Will，但問到她是否由男方拉她入殘廁，而非她做主動時，一直承受沉重壓力的 Coffee即時缺堤爆喊。
「其實係！我一直冇澄清，因為我唔想傷害個男仔。（其實佢有責任幫你澄清！）我都有責任，因為我應該意識到嗰度係 ifc，有咩問題都係自己問題。
「其實嗰晚我斷咗片，（酒後）唔係好記得講過啲乜，如果記得我會第一時間先同屋企人講對唔住，我冇諗過咁嚴重，冇諗過錄咗咁多嘢，而且我冇喺廁所同人發生性行為。（喊得更厲害）嗰晚我飲醉至嘔，好唔舒服，佢帶咗我去廁所，之後佢錫我，咁我都鍾意佢，我嗰啲聲音（呻吟）係好自然嘅反應。之後有清潔阿姐敲門問有冇人，當刻我想快啲出去，所以就話我哋返屋企先！當時我已意識有人喺出面，嚇到醒曬，點知一開門係記者，係我諗唔到。」 Coffee說。
獲父親原諒
殘廁報導出街後，被追訪的 Coffee媽傷心喊爆，大受打擊。自己闖禍， Coffee說最難過是令家人丟臉；事後她匿到朋友家暫避，之後避走北京，無法面對家人。
「到而家我都冇同家人交代件事，因為我面對唔到佢哋。件事爆咗後，我只係 send message同佢哋講：『對唔住爸爸，令到你哋冇面，除咗講對唔住，我唔知仲可以講乜。我冇面返嚟見你哋！係我問題係我錯，我好錫你哋，好掛住屋企人。』
「其實嗰刻我唔知點樣生存落去（有諗過自殺？）我唔知會唔會咁做！後來爸爸話：『冇事，爸爸喺度，爸爸幫你擋！』我好多謝爸爸同我講呢番說話，起碼佢會原諒我，令我可以繼續行落去。」
落井下石
一場「殘廁風波」，令 Coffee看清人情冷暖。一班味之天使全力撐，雪中送炭，唯獨陳蕊蕊落井下石，指 Coffee身為公眾人物，行為過分，並強調自己不會和男友金剛去殘廁，句句寸。
壹：同陳蕊蕊仲係咪好朋友？
C：（苦笑一聲）其實我已經唔識點分係咪好朋友。
壹：係咪關傳過金剛追你事？
C：冇件咁嘅事。其實我當佢係朋友，不過呢件事令我好唔開心，喊咗一晚。
壹：蕊蕊有冇問候過你？
C：冇，但我諗佢可能唔想煩我，又或者佢唔得閒，我唔知。
|
鍾意就快D Share啦！
|
|
|
