掃呢頁CODE去手機

2014年8月27日 星期三

[FACE 379] 明爭暗鬥 強國隊友使橫手 姜麗文爆選秀騷黑幕 姜麗文,MF,




真面目

明爭暗鬥 強國隊友使橫手 姜麗文爆選秀騷黑幕

香港藝人北上搵食一啲都唔易,最重要係打響個朵,好似星運一直坎坷嘅秦沛仔女姜文杰、姜麗文( Benji& Lesley)兄妹檔,最近就參加咗浙江衞視「星二代」選秀騷《我不是明星》而人氣勁升,可是另一位強國對手竟靠老豆與電視台的「良好」關係,將姜氏兄妹由第一踢落尾二,幾乎被 out!

Benji& Lesley好無奈話:「個個選手都有層出不窮嘅方法去攞高分,唔通我又叫老豆去拗咩!」

被害幾乎包尾

姜麗文和哥哥姜文杰在《我不是明星》的第二、三集連奪冠軍,形勢大好,但第三集加入的強國對手王也,老豆王志飛是國內著名影星,娛圈地位有如三哥苗僑偉;表面上老豆在節目中反對王也參賽而嗌大交,實則老豆因拍過多齣劇集與浙江衞視關係超好,故暗中拉監製開秘密會議,要阿仔攞高分,結果 Benji& Lesley第四集雖然表演高難度空中綢帶舞,卻跌落尾二幾乎出局,表現麻麻的王也卻第二名,成功晉級。

Lesley上週臨飛杭州拍第六集前在電話中無奈地說:「可能熟啲嘅單位會好啲啩!其實個個選手有層出不窮嘅方法去攞高分,唔通我又叫老豆(秦沛)去拗咩!」

Benji& Lesley本來有機會奪得五連冠,可惜因有人使橫手,令他們在第四集只得到第三名,總成績更幾乎包尾險被淘汰。

有傳內地王也爸爸王志飛(小圖)表面反對兒子參賽,實則要製作人捧紅王也,更有攝影師因不滿安排而同王爸口角,推撞間被消防櫃玻璃割傷,要入院打破傷風針,姜麗文稱有聽聞,但沒有親眼看見。

電視台迫賣命

Lesley在第四集表演綢帶舞,要吊高十幾呎做出一字馬等高難度動作,卻沒有任何威也或地墊等安全措施,全程搵命博。 Lesley爆幾乎出意外:「差唔多所有表演項目都係電視台叫我哋做,而且有時得個幾兩個鐘頭練習咋!練習嗰陣得地下有兩塊床墊,我隻手擺錯位,幾乎頭落地,嚇死我哋!正式時電視台為咗好睇啲,冇做安全措施,哥哥驚到走咗入佈景後面唔敢睇!」可惜搵命博卻被人使橫手得尾二。

姜麗文於第四集要吊高十幾呎做空中一字馬,但電視台拒絕加設安全措施,她唔敢違抗唯有頂硬上。

Benji& Lesley最新一集表演沙畫,贏得全場掌聲及再奪第一名。

老豆秦沛帶挈

《我不是明星》是「星二代」競賽的選秀騷,雖然 Benji& Lesley在國內冇乜人識,但爸爸秦沛在中港台三地拍過唔少電影電視,在內地頗具名氣,節目又刻意介紹秦沛熟悉的巨星有劉德華、周星馳、張學友、郭富城等,為他們加了不少分數。在幾乎被 out危急之際,他們又請到陳奕迅在節目中直播電話通話打氣,又有房祖名被捕前最後一次現身支持, Benji& Lesley即人氣反彈,微博粉絲激增 30萬,因此電視台最終屈服,讓他們重奪第一,繼續晉級。

老豆秦沛驚喜撐場,事前兩兄妹完全唔知,三父女溫馨場面令 Benji& Lesley微博粉絲人數急升 30萬,電視台惟有遵從民意,讓兩人重奪冠軍位置。

房祖名出事前曾上節目撐姜氏兄妹,幸好事發後成績沒有被拖累。

《我不是明星》玩乜?

林德信上季參賽時邀請了老豆林子祥和「繼母」葉蒨文撐場。

《我不是明星》是浙江衞視的選秀騷,已進行第四季。每集有 4位明星子女以才藝表演比拼,由觀眾投票,每兩集淘汰最低票數的一位,下集再加入一位星二代繼續比賽,中途加入踢館賽,最後選出總冠軍。曾參賽的香港藝人有林德信、原子鏸和王子涵,但未有勝出。

星二代做乜最啱?

星二代雖則有老豆老母撐腰,但有辣有唔辣,好就話有靠山,唔好就俾人鬧陀衰家,不過有啲星二代好有自己 style,將來可以考慮吓以下戲路,或者直頭轉行都得!

房祖名做獄警

房祖名吸大麻被捕,最好演獄警!《監獄風雲》都係獄警俾人打好睇啲嘛!如果成龍演埋監躉,一腳踢開房祖名 5米遠,票房肯定好勁!

欣宜甜品店

欣宜肥膏帶不走,唯有笑隨身,最適合開甜品鋪,繼承肥姐嘅開心果形象,又可食盡天下甜品,肥得有道理就唔怕俾人笑

王子涵做美人魚

王晶女王子涵傳出會露兩點拍情慾戲,點知老豆王晶出嚟澄清冇咁嘅事,失望!不過王子涵可以考慮吓星爺套《美人魚》呀,胸前有兩個貝殼,至少唔使露點吖!



鍾意就快D Share啦!