【新鮮娛頭】祖兒任Yumiko姊妹 爆阿Sa玩新郎絕招 掹兄弟99條毛
2014-08-25 07:30:00
Joey話會送一日時間畀Yumiko，因為佢要做姊妹。(攝影：仇志德)
噚晚灣仔伊館舉行《太陽計劃2014展翅青見夢飛行》，容祖兒（Joey）、張敬軒、N-Sonic、衞蘭同埋Lollipop F都有出席。
講到鄭希怡（Yumiko）嚟緊將擺喜酒，問到Joey會送咩畀Yumiko？佢就話會送一日時間畀佢，因為到時Joey會做姊妹，之前Yumiko喺泰國蘇梅島舉行pre-wedding party，Joey就冇出席，所以今次一定會去，又話有十個好勁嘅姊妹，有祖兒，阿Sa（蔡卓妍）、阿嬌(鍾欣桐)、應采兒、李璨琛老婆，黃伊汶同埋Yumiko嘅圈外朋友。
講到點樣玩新郎，Joey就話成班姊妹開咗個group傾，不過自己唔係好識諗呢啲嘢：「阿Sa話要掹啲兄弟99條腳毛，又諗過一個類似冰桶挑戰，不過就唔係淋冰淋水，而係淋其他嘢，又諗過叫新郎喺限時之內，幫啲兄弟貼假眼睫毛。」咁怕唔怕到時畀人玩番轉頭，Joey就話：「唔怕，因為一班姊妹都係喪，相信到時唔係俾人玩，佢哋顧掂自己先。」
同場嘅張敬軒終於明白，韓國嘅演藝人真係好犀利，因為韓國組合N-Sonic，噚晚都有表演，軒仔就話見到佢哋綵排，覺得佢哋好專業：「佢哋一上到台就自己識企番自己個位，真係好專業，綵排完之後，仲會向台上所有工作人員鞠躬。」
軒仔又話知道韓國嘅藝人訓練係朝十晚十，仲話：「其實同我哋真係相差好遠，製作上都有好大嘅隔離，佢哋一個MV講緊嘅係10萬美金，而我哋就只係兩三萬港元，之前好多前輩都話我哋青黃不接，所以香港娛樂圈真係要東山再起，大家都真係要好努力，加上韓國政府會支持藝人發展，都想香港政府都會咁做。」又話自己都會去學習，知道邊到有韓國嘅騷都會去睇。
祖兒爆成班姊妹到時會玩得好喪。
軒仔話覺得韓國嘅演藝人好專業。
N-Sonic俾軒仔大讚。
|
鍾意就快D Share啦！
|
|
|
