掃呢頁CODE去手機

2014年9月4日 星期四

[壹週刊 1278 財經] 廿八歲仔引「外援」 追擊許留山 M1,




Joe與朋友開設公司,代理台灣食品。今年初從台灣引入杧果冰專門店 MangoChaCha,向同樣以杧果馳名的許留山「挑機」,目標是在明年開多兩間分店。

壹盤生意

廿八歲仔引「外援」 追擊許留山

愛將頭髮 gel得又直又挺的吳偉忠( Joe),做起生意來,亦十分進取。自言性格坐唔定,喜歡「四圍騰」,兩年前索性辭去廣告公司工作,和朋友聯手創業,代理台灣食品。第一個代表作,是拿到台灣雞蛋布丁品牌「查理布丁」的代理權。第二個代表作,就是引入台灣杧果冰專門店「 MangoChaCha」。

四月開店,天氣仍涼,位處尖沙咀偏僻橫街,最貴的一碟杧果冰,索價一百二十八元,仍一開即賺,上月盈利達八萬元,撒手鐧就是台灣土炮杧果——愛文杧。 Joe視杧果甜品大佬許留山為假想敵,計劃儲夠彈藥再開多幾間分店。打大佬尚言之過早,他指現階段的目標是:「我想香港人諗起杧果甜品店,除咗許留山就係我哋!」

香港杧果甜品店大佬許留山,十多年前曾大張旗鼓進軍台灣市場,可惜幾年間便全線結業,鎩羽而回。在 Joe眼中,台灣土炮甜品店噱頭十足,確有能力「打大佬」。去年十月,他和拍檔去台北參觀食品展銷會,閒時上網搵食,在台灣版食評網站 OpenRice,發現一間杧果冰店長期在排行榜頭三位,於是走去試食。「去到鋪頭,見到一個染咗一大束橙色頭髮嘅中年阿叔喺度招呼客人,仲好熱情咁同我哋傾偈。佢嘅杧果冰好受歡迎,見到好多日本遊客幫襯。我就諗點解香港冇人識?覺得有得做。」

開業僅四年的 MangoChaCha,在台灣有五間分店,賣點是以台灣土炮杧果愛文杧製成的各式甜品。 Joe有代理查理布丁的經驗,加上承諾只用對方提供的愛文杧果肉,成功拿到香港、澳門及廣東省的獨家經營權,深圳除外,因老闆有親戚計劃在深圳開店。「之前有香港人搵佢哋傾代理,貪平想用其他杧果,被老闆拒絕。」 Joe笑指,他睇中的,卻正是愛文杧這個王牌。

冰類產品的分量較大,店內特設卡位,方便家庭客。

香港店有一半生意額來自熱食,包括杧果雪糕窩夫(上圖)及杧果卷(右圖),前者售$68,後者售$58。

賣點一 愛文杧專門店

台南特產愛文杧,屬紅杧,果肉較一般杧果更黃及實淨。

愛文杧是台南特產,果皮為紅色,果肉呈金黃色,深受台灣人歡迎,香港一些高級果檔亦有引入,但主流仍是菲律賓的呂宋杧果。「喺香港食開嘅呂宋杧,一時好酸一時好甜,愛文杧味道清甜,質素穩定。」根據合約,香港店的主要食材,全部向台灣總公司入貨,包括切好的急凍愛文杧果肉、杧果冰磚及雪糕等,他解釋:「合約為期三年,每年交十萬元加盟費,利潤不用再向台灣分成,可能佢哋覺得已賺埋入材料嘅錢。」

香港店面積約八百呎,以橙色和白色做主題,門口及店內擺放兩部大電視,不停播放日韓台關於杧果冰的節目。現時, MangoChaCha主打淋上黑糖漿的棉花冰及杧果雪花冰,加上杧果雪糕等配料,毛利可達七成八。店內不少客人,都是為品嘗愛文杧而來。客人 Angel試過杧果冰後表示:「愛文杧味道不太甜,好啱女仔食。」

賣點二 冷門杧果產品

天氣炎熱,位於尖沙咀赫德道的 MangoChaCha,每晚九時後即出現人龍,門口的電視不停播放日韓台的杧果冰節目作招徠。

許留山並非獨沽一味賣杧果甜品,另有其他水果甜品,以及咖喱魚蛋等小食。 Joe坦言香港人對杧果冰的興趣不及台灣或日本人,但堅持不會用其他水果,「我哋嘅特色就係杧果專門店,最多喺雪糕上面花心思,如賣吓曲奇味。」為增加甜品種類及應付冬天淡季, Joe向台灣總店力爭,加入一系列台灣店沒有的熱食。「最後台灣老闆答應,俾我哋自行研製新產品,唯一要求是要用愛文杧。」

現時,店內已有杧果雪糕窩夫餅,杧果「厚多士」、杧果梳乎厘等熱食, Joe表示:「就算係夏天,熱食類都佔生意額達五成,所以唔怕冬天冇生意,嚟緊仲會推出杧果湯圓。」

另外, Joe還向台灣總店,購入一批以杧果為主題的副產品,如杧果香皂、杧果甜酒、杧果醋、杧果面膜及杧果醬等。臨近中秋,他曾想推出杧果月餅,但來不及調製味道,因此便推出杧果酥禮盒,配以網上團購形式發售,共賣出三百多盒。 Joe表示,代理查理布丁的經驗,令他知道開鋪不能靠單一產品,「查理布丁生意冇乜增長,就係因為款式太單一。」

隱憂一 產期短影響質素

呂宋杧全年都有供應,但愛文杧當造期只得兩個月,為每年五至六月。上週訪問期間,記者找遍油麻地果欄,都沒有愛文杧,最後於九龍城一間專門賣空運水果的鋪頭才買到,每隻要六十八元。

為了應付全年所需,台灣杧果商會將杧果採摘後,去皮再以零下四十度雪藏。急凍果肉儲藏到冬天才用,質素難免下滑。 MangoChaCha四月開鋪時,曾有客人吃後,指果肉味淡及有渣。 Joe承認:「部分杧果肉質素可能會差咗,惟有盡量製作成熱食補救。」

時逢中秋節,店內推出杧果酥禮盒應節,四個裝售六十八元,已售出三百多盒。

杧果面膜是從台灣總店引入的副產品之一,售$28/兩塊。

棉花冰磚及所用的機器,全部向台灣總店訂購,製作過程簡單。

隱憂二 價錢貴 難入內地市場

Joe的第一單「大刁」,就是拿到台灣雞蛋布丁品牌「查理布丁」的代理權,兩年前於旺角銀城中心開設專賣店。

一個呂宋杧售價約十元左右,但愛文杧最平亦要二、三十元,較好的品種,甚至要六十至八十元。「我哋用嘅就係六十蚊嗰隻。」 Joe指因材料貴,一碟配以杧果肉的黑糖冰,售四十八元,杧果冰最便宜要五十八元,最貴的「兩溝」冰底再加雪糕及果肉,售一百二十八元。初時, Joe打算香港及廣州同時開店,最終因定價方面同拍檔出現分歧而告吹。 Joe無奈道:「我哋想行高檔路線,佢想平民化,而且大陸食品入境好多要求,我哋要從台灣入貨,比較麻煩。」

隱憂三 鋪位偏僻

香港店選址尖沙咀赫德道,附近有不少酒吧及糖水鋪,但由於 MangoChaCha位置近漆咸道南,人流明顯不及寶勒巷一帶。 Joe坦言,目前主要靠早前傳媒報導及口碑吸引客人,「 Walk-in嘅客人不多,希望用專門店嘅噱頭,吸引客人專程來食。」 Joe在開店前,曾找來一些略有名氣的𡃁模造勢,如邦民財務廣告的「邦女郎」陳嘉寶,以及「高登女神」黃美琪等。最近,他又計劃和近期流行的 3D照相館及「逃出香港」等公司合作宣傳,「例如可以喺 3D照相館加啲杧果嘅立體畫嚟影相,或者我喺鋪頭就劃一個區域俾客人影相,互相宣傳。」

開店四個月,天氣仍炎熱,晚飯後的黃金時段,鋪頭外約有十多人等位。 Joe指目前生意增長空間不大,但對前景信心十足:「第一間鋪最緊要打響名堂,希望儲到口碑同彈藥,開多幾間分店,透過大量入貨來壓低食材成本,才可以提升利潤。」

開業資料( 4/14)

租金:$40萬*

裝修:$60萬

入貨:$15萬

雜費:$5萬

特許經營合約費:$10萬

總投資額:$130萬

營業資料( 7/14)

營業額:$32萬

租金:$10萬

入貨:$7萬

雜費:$1萬

人工:$6萬

盈利:$8萬

一點意見

以杧果千層班戟起家的沛公甜品,十月份將於銅鑼灣開設第四間分店,老闆曹捷沛認為, MangoChaCha以台灣杧果冰做主題夠 gimmick,但卻有三個地方要留意:

1.愛文杧果做甜品不及呂宋杧出色,因為呂宋杧當造季節較長,杧果味亦較香濃,愛文杧果只得甜味沒有香味。「呂宋杧成本較平,一般五至十五蚊一個,愛文杧動輒要數十元。」

2.許留山分店多, Joe單做杧果類甜品風險高。「沛公尖沙咀店就喺佢哋附近,該店杧果產品所佔生意額由七成跌到三成,要增加榴槤甜品。」

3.MangoChaCha鋪位人流較少卻要十萬租金,沛公尖沙咀店人流較多卻只需十三萬租金,「赫德道同寶勒巷做旺咗,但人流都分唔到佢那邊,做唔到 walk-in客,生意額差好遠。」



鍾意就快D Share啦!