【人夫有料爆】Eric Kwok影葉佩雯艷照：試過幾次都唔成功....
2014-09-03 10:00:00
Eric Kwok講笑話試衝入廁所影葉佩雯，不過只係想聽佢嘅尖叫聲。(攝影：盧妹)
噚晚一本男士時尚雜誌，喺西環舉行「FASHION OBJECTS DESIRE Awards」活動，一班型男陳奕迅（Eason）、周柏豪、郭偉亮、許廷鏗、洪永城同埋林樹鑫就獲得年度大獎，不過Eason就冇出席。
佢哋個個都着住秋冬裝現身，仲要喺街頭接受採訪，真係見到都覺得熱，而Eric Kwok仲着住三件頭西裝，雖然好熱，但一樣都咁有型。
講到佢可以攞到呢個獎，佢就笑住話留咗鬚之後男人味重咗，又話接咗幾部電影，年尾仲有會參與一個認真嘅劇本，要演一個變態殺手，仲話有啲興奮，問佢係唔係好鍾意睇呢啲變態情節電影？佢就話：「成日煲，一返到屋企就變態，所以其實Grace(葉佩雯)對我好包容。」
問Eric Kwok係唔係第一次做咁多戲份嘅電影，佢就話：「戲份就未知有幾多，不過就係第一次咁認真。」佢仲有問過導演，使唔使去街市學人劏豬：「不過導演就話唔使，不過要我瘦多10幾磅，我0依家要開始減，因為我唔可以幾個星期就變張家輝，我仲同導演講，話我講對白唔好，但係導演就同我講，話我個角色唔係好多對白，不過導演就要我做出嗰種有臭味嘅感覺。」
咁學你個朋友謝霆鋒就得，因為霆鋒唔沖涼，Eric Kwok就話：「邊個爆出嚟？好似係Eason爆出嚟，不過唔知佢0依家仲係唔係咁。」
近日荷里活有艷照流出，Eric Kwok就話啱啱自己都睇咗，咁有冇同老婆Grace影？佢就笑住話：「佢都唔俾我影，我試過幾次都唔成功。」咁係你影老婆定係佢影你先，佢就話：「我都冇嘢好影，梗係我影佢啦。我試衝入廁所，不過我都係玩下，我只係鍾意見到佢大叫，其實最近都有諗過放啲嘢放上iCloud，所以啲私人嘢，都係唔好放上網。」
周柏豪就係第一年攞呢個獎，佢話今年自己好似做咗好多唔關自己事嘅嘢，感覺大個咗，咁有做過啲咩？佢就話嚟緊喺紅館開騷，問到進度如何，佢就話：「正0架，進度滿意，好難得可以日日唔做嘢，淨係操肌。」
之前張智霖開騷操肌，搞到心情唔好，柏豪就話：「因為我直頭憎啊，所以日日都要操佢，不過我就唔使戒口。」佢又話會有高難度動作，早幾日仲試過血糖低而暈：「唔係冇晒知覺，而係暈咗一暈，瞓咗喺架車上面，係咁飲汽水同運動飲品，不過都唔得，我仲工作人員講，15分鐘都係咁，就送我去醫院，不過最後當然冇去，我唔想喺娛樂版俾人話操肌過度入院，我死都唔會入0架，0依家反而要食多啲嘢，不過有線條。」講到高難度動作，公司有冇幫柏豪買重保險，佢就話有買，不過唔知幾多錢。
周柏豪近期為紅館騷操肌。
Eric Kwok嚟緊會喺新戲演變態殺手。
|
鍾意就快D Share啦！
|
|
|
