關楚耀幫口 撐方皓玟冇整容 仲索咗
2014-10-28 15:52:00
(攝影:溫敏芝)
關楚耀(Kelvin）、Robynn & Kendy今日喺旺角出席茶木微電影首映禮，Kelvin話今次係幫代言餐廳拍微電影，微電影中同Robynn、Kendy分別有蜻蜓點水式接吻，拍攝時都有勾起以前初戀。
之前有報道指關楚耀同長髮女夜蒲，佢話嗰次唔係夜蒲，如果係女友都唔會咁易俾人影到，又謂依家冇女友，而當晚俾人影到嗰個係方皓玟，當時一班人食飯。之前好似傳過方皓玟整容，係咪整到冇人認得？關楚耀話：「冇整呀，06年已經識佢，依家索咗咁多。」即係之前唔索？佢話：「佢之前都索。」至於張敬軒因佔中被網民鬧爆，佢話冇留意。
Robynn & Kendy今日出碟，佢哋話之前拍其中一個MV，因為當時又要排舞台劇，搞到36小時冇瞓。佢哋話依家內地都多咗工作，亦多人認識咗佢哋。
講到佔中發展多日，Robynn係中共元老孫女，佢有咩睇法？「我覺得依家希望大家安全，和平面對所有野。」你係咪支持學生？佢話：「我哋希望和平，大家平心靜氣解決，有啲嘢需要時間。」覺唔覺得自己身份比較尷尬？佢話：「我哋都有好多fans去佔中，都好擔心佢哋，希望安全啦。」
至於張敬軒俾網民鬧搞港獨，Robynn話呢啲嘢唔知，又謂好難避免，身為公眾人物好難話唔俾人鬧，最重要自己調節到。問佢作為官二代，係咪要小心慎言，佢話冇諗咁多。咁父母有冇提醒小心講嘢？佢亦話：「冇呀，屋企人唔講呢啲，唔會提呢啲。」
關楚耀
Robynn & Kendy
|
鍾意就快D Share啦！
|
|
|
