容爸呢十幾年做過唔少行業，做車行期間，接受過幾次訪問，但每次都話冇使祖兒錢。
媽咪姐
容爸唔認靠祖兒 容媽繼續慳
容祖兒有名圈中小富婆，仲有幾層樓喺手，但佢爸爸最近俾人貼街招追數。雖然無開名，但係人都知街招講緊祖兒。因為咁，經理人 Mani就幫口，話祖兒已盡女兒責任，以後老竇喺出面發生乜事，都同祖兒冇關。而平時好 nice嘅容媽，就低調避傳媒，去跑馬地平民超市買餸都戴晒口罩，一如以往自備膠袋慳錢。
容爸聽到祖兒果斷同佢割席，話要澄清自己咁多年嚟，從冇使過祖兒錢，俾人追債已努力 settle緊。媽咪姐都知容爸咁多年嚟搞過唔少生意，同朋友開過車行、喺東莞賣衫同深圳搞夜場。但多年嚟又好幾次俾人追數，周轉有問題。媽咪姐之前同容爸傾過，佢話：「以前好多嘢唔識珍惜，祖兒一蚊都冇俾過，我有手有腳，自己搞得掂喇！」查實容爸談吐爽朗率直，又風趣幽默，同祖兒嘅個性一樣。雖然話無仇不成父子，但都係嗰句，家和萬事興，和氣生財嘛！
容爸一樣慳
早喺十年前，容爸曾經做番老本行，買衫返東莞賣。由香港拎住幾袋貨，坐車轉船再坐電單車返舖頭，慳錢程度不下容媽。
|
鍾意就快D Share啦！
|
|
|
