突然現身
馬賽周三（ 5日）突然現身大台，她直認接拍《東坡家事》，當日是試造型。被雪三個月就冇事，馬賽認真幸運。
滾熱辣
鬼祟解凍拍新劇 馬賽演妓女博翻生
7月尾，馬賽穿着情趣內衣跳艷舞的短片流出，即遭大台宣布雪藏。不過大台花旦買少見少，馬賽不久就轉任娛樂台主播，雖然降咗呢，但可以保持曝光率，只是冇得拍劇，名義上仍被雪藏。
不過，本刊收到消息，最近大台已暗地裏解凍馬賽，還給她夥拍收視福將歐陽震華，拍攝新劇《東坡家事》。不過大台對馬賽拍劇一事，卻極為保密，除了未有安排她出席《東》劇上周的開鏡儀式，就連該劇海報都「被消失」。相信是希望淡化艷舞片對馬賽的影響，掩飾她的「雪藏期」僅得三個月，維護大台僅餘的威嚴。
今年 7月，馬賽穿着情趣內衣跳艷舞的短片流出，大台火速安排馬賽開記者會解畫，不過形象仍直插谷底。去年馬賽與汪子琦在上海被拍下親密照之後，樂易玲曾問過馬賽是否還有其他「黑材料」。當時馬賽誓神劈願表示沒有，結果樂易玲事後知道馬賽連自己都呃，幫唔落，任由她被打入冷宮。
「馬賽一向把口好叻，𠱁得樂小姐好掂。出事之後，馬賽聲淚俱下求樂小姐俾機會佢。樂小姐眼見依家大台花旦買少見少，都有心軟，不過佢覺得馬賽點都要過冷河，所以叫佢去英國遊學洗底。返嚟之後，馬賽話自己 ready拍劇，咁新劇《東坡家事》入面有個叫琴操嘅妓女角色，原本係搵 JJ（賈曉晨）做，佢檔期唔得，樂小姐咪即刻安排馬賽頂上，仲加重琴操戲份。」知情者說。
其實「雪藏」未夠一個月，馬賽已經被調往收費台任娛樂新聞的普通話主播，又出席 fashion show搵銀，近日更獲全面解凍拍《東坡家事》，實在能人所不能。但上周五《東坡家事》的開鏡禮卻冇安排馬賽出席，就連該劇海報都刻意剔走她。據悉是樂易玲意思，希望用時間淡化馬賽的負面新聞，同時可以製造假象，令其「雪藏期」加長，盡量保持大台威嚴。
監製認戲份重
記者向《東坡家事》監製黃偉聲求證馬賽解凍拍劇，他不但直認馬賽有份演出，還稱有很多戲份，同男主角歐陽震華更有多場對手戲。不過對於她沒有出席開鏡禮則解釋牽強。
記：記者 黃：監製黃偉聲
記：點解上周《東坡家事》試造型冇馬賽份？
黃：係呀……嗰日佢啲衫未造起……
記：馬賽今次飾演妓女？
黃：唔係妓女，係琴操姑娘。
記：個角色本來係搵 JJ?
黃：係好耐之前嘅事，佢個檔期配合唔到。
記：馬賽 ready拍劇未？
黃：我同佢傾過偈，佢 ok！
記：佢今次多唔多戲份？
黃：梗係多佢同 Bobby（歐陽震華）最多對手戲！
雖然監製說馬賽多戲份，但她的對手歐陽震華卻竟然唔知馬賽有份拍，他透過經理人回覆表示:「冇人講過有呢個角色喎，都唔知馬賽有份演出！」看來馬賽飾演的琴操，明顯是臨時獲加戲份，原本和歐陽震華同場的戲份不多。
冧 TB打入影圈
除了在電視圈繼續進擊，馬賽心知形象不再「入屋」，於是千方百計搭路入影圈。早前她卒之埋到許鞍華堆，在其新戲《 8部半》演出。
知情者透露：「馬賽之前喺浸會大學讀電影及電視課程，佢住宿舍時有一個 TB已經好冧佢，後來個 TB入咗電影圈做 PA（助導）。馬賽知佢識好多影圈人，所以出事之後，就搵佢哭訴，話自己想試下拍電影。為咗冧 TB，馬賽仲成日同對方 wechat，卒之 TB知阿 Ann（許鞍華）新戲有一個學生妹角色，咪向阿 Ann推薦馬賽。咁馬賽扮慣『純純兔』，許鞍華都覺得佢適合。」
馬賽個底咁花，都有大台同大導演撐，似乎「識做人」緊要過「識做戲」！
舊愛微博晒復合
雖然汪子琦因為馬賽介入同內地富婆 Laura分手，不過近日兩人明顯關係修好，不時在微博晒恩愛，看似復合。
讚 Laura天使
汪子琦 9月尾話自己身邊一直有個守護天使，明讚 Laura係天使，對她不離不棄。
馬賽「雪藏」事件簿
馬賽出事之後，雖然被大台「雪藏」，不過一直都有曝光，而且生活並不似她自言要靠家人接濟咁慘。
喊爆維穩
7月尾爆出艷舞短片後，大台即動用維穩節目《東張西望》為她做訪問，之後又為她開記者招待會，馬賽全程喊爆。
出騷搵錢
雖然被「雪藏」，但她在 8月中已經可以接時裝騷搵真銀。她全程大講佛偈，成傳媒焦點。
英國遊學
馬賽到英國遊學，大台直擊她登機的過程，甚有為她「洗底」做宣傳之嫌。
中環濕平
馬賽在 9月尾被發現與女性友人到中環行街，她十分鐘就豪花近八千蚊，不似財困。
打入影圈
10月，馬賽成功殺入影圈，拍攝許鞍華執導的新片《 8部半》。
|
鍾意就快D Share啦！
|
|
|
