2014年11月11日星期二

金秀賢身形吹脹嚇窒廣告商改用金宇彬代言金秀賢,金宇彬,

【短片】【韓流】金秀賢身形吹脹嚇窒廣告商改用金宇彬代言

2014-11-11 08:00:00

其他影片：>>

【韓流】金秀賢身形吹脹嚇窒廣告商改用金宇彬代言

雖然劇集《來自星星的你》已經大結局咗近一年，但金秀賢喺內地仍然人氣爆燈，唔少廣告商仲睇中佢靚靚仔仔，而且形象健康，邀請佢做廣告代言人添，淨喺呢半年，金秀賢喺內地已經接咗10幾個內地廣告，汽車、手機、飲品、薄餅等樣樣有，單係廣告總收入已經勁賺過數億人仔，吸金力驚人得很！

不過財運人氣兩得意嘅金秀賢近期好似有少少放縱自己，現身公開場合時都被人話佢個身形同佢個銀包一樣暴脹咗唔少，特別係佢早前現身廣州汽車活動嗰時，原本嘅尖面變成圓面外，下身大腿位置仲暴脹得有少少逼爆褲嘅現象，完全失去原有嘅男神魅力。

有內地廣告商見到金秀賢變成「脹爆教授」後都紛紛打退堂鼓，有內地床上用品廣告商日前見到金秀賢走樣後，話佢缺乏年青朝氣，仲決定飛起金秀賢，改用憑劇集《繼承者們》而喺內地走紅嘅男星金宇彬做代言人，據知廣告代言費仲高達千萬人仔添，金秀賢今次認真陰公喇。

而金宇彬嘅廣告相已經出街，相中金宇彬著住白衫加白褲，半躺喺張床上面，擺出一個誘惑眼神，冧女程度又真係同脹爆金秀賢成一大對比。而金秀賢嘅《星星》好拍檔全智賢近日現身韓國機場時亦嚇現雙下巴，不過佢就仲未被刪廣告。