掃呢頁CODE去手機

2014年12月17日 星期三

[FACE - 395] 鷹 sir×點 Jack翻 hit 捱足 18年周俊偉:仲生存到! 周俊偉,MF,




爆 Like王

鷹 sir×點 Jack翻 hit 捱足 18年周俊偉:仲生存到!

被網民捧為神劇嘅《警界線》上週播完,除咗製作認真,劇中忽然出現老麥「點 Jack」廣告。

攞明係超級植入,但夠創意網民反而 like。出道 18年嘅周俊偉亦再度令觀眾留意。

01年《初戀嗱喳麵》做男一,亦做過偶像派歌手。當年做歌手出碟一腳踢,但窮到連食飯都冇錢。

他說:「最困難試過數毫子買碟油菜,捱唔住嗰陣,成日諗住轉行。揸車又好,揸鐵又好!」

好彩佢頂得住,唔係點有鷹 sir加點 Jack出現呀?

F:《 FACE》 周:周俊偉

F:為何有「點 Jack」出現?

周:兩個星期前先有呢個 idea,然後就話隔兩日拍喇。原本髮型都仲連緊另外一部戲。

我聽完佢哋個 idea都覺得幾有創意,就直接剪埋個鷹 sir頭畀佢連返那場戲。

係一個幾新鮮大膽做法,起碼香港電視史上未出現過咁嘅嘢啦。

朝早一起身,個 facebook已經畀人質爆晒段片。啲人留言「嘩!畀你呃咗喎!」「真係睇到 O咀喎!」

《警界線》周俊偉飾演鷹 sir,成功令佢洗甩靚仔形象。

《警界線》突然出現「點 jack」廣告,香港都係第一次有呢類植入廣告。

01年《初戀嗱喳麵》,當時周俊偉得 22歲,戲中楊丞琳已是天后,周俊偉話:「我好旺啲女仔㗎,同我合作之後都紅,男仔係要多啲時間浸。」

F:最初拍《初戀嗱揸麵》已經係主角,𠵱家先再被留意番,中間有冇氣餒過?

周:成日都會諗死啦會唔會就咁就冇呀, fade out咗呀。會唔會支撐唔到自己生活呀?

最困難試過數毫子買碟油菜,係當年自己揼錢成立 studio差唔多要執嘅時候。

冇聽過難聽說話,因為根本冇人知,自己硬食晒,後尾拍戲先多返啲收入。

捱唔住嗰陣,成日諗住轉行。揸車又好,揸鐵又好!揸鐵都幾好撈㗎,順便健下身。

當有呢啲諗法嘅時候又會有人啲朋友,同事會阻止我,屋企反而唔會喎。

低潮嗰陣心裏隻鬼就會出嚟講,「你唔得喇,冇人搵你喇。」

但咁樣就會提醒我,幾時都有個危機感存在。

F:會唔會覺得自己唔夠運?

周:我喺呢行相對運氣已經唔差,起碼有《警界線》呢啲角色畀我。好多人話我做得 over,但電影始終銀幕大啲,唔需要做太多,觀眾就會明白,但電視始終縮返細。

我會覺得做多少少先有一個戲味出來,如果我做返電影嗰隻鷹 sir導演可能覺得未必夠。

我可以好似拍電影嘅演法,好型嘅、好 cool咁做,觀眾又可能話點解鷹 sir咁扮嘢,做咩懶係型呀,我覺得亦會有另一種評語出現囉。有好多人係呢行已經唔見咗。做演員很難主動,有好多人日日都去 casting,好多時冇就係冇。做演員需要低調啲,因為觀眾入去戲院係睇我演出嘅角色。

所以現實生活唔好太有形象,如果唔係好難令人相信。一部戲最主要係編劇同導演,演員係要 develop佢哋嘅故事,而唔係突出自己。做戲就係要呃得到觀眾,令你以為係嗰個角色而唔係周俊偉。

我呢種演員係難生存架,但係我都仲生存到。証明我都未錯得晒。



鍾意就快D Share啦!