鄭嘉穎咀巧了得 謝安琪：我都叻！
「男神」鄭嘉穎最近被《好報》拍得在夜店攬啜巨咪女，昨日他出席新劇開鏡拜神儀式時指巨咪女是圈外人，希望大家給予空間發展。將與嘉穎咀戲連場的謝安琪坦言不會向老公張繼聰備案，更自誇咀功不遜嘉穎：「我都叻o架！」
鄭嘉穎、謝安琪、陳凱琳、黃又南、關禮傑、陳山聰等昨日到將軍澳電視城，為無綫三十集重頭新劇《殭》開鏡拜神。現年四十五歲的嘉穎被《好報》拍得在夜店與巨咪女親熱，哄動全城。首次拍劇的謝安琪與嘉穎於劇中有咀戲，提到嘉穎咀女叻，問她可要向老公張繼聰備案？她笑說：「我都叻o架！唔使備案，要備案佢仲唔着數。」謝安琪透露會在家與老公對戲，早前更跟他拍劇了解製作流程。
唔想影響巨咪女生活
有備而來的嘉穎被問與巨咪女是否情侶關係？他說：「人哋圈外人，已經帶咗好多麻煩、煩惱畀人，圈外人唔想咁高調，畀啲空間我啦，一日未公布大家都唔好亂估，等我公布大家咪知，唔畀空間我好難發展。（識咗幾耐？）總之畀啲空間我，唔好理我啦。」他又否認被指猴擒：「唔好用猴擒字眼，小弟都單身咗好耐，好想有個伴，唔想一個人。（對方詐型？）唔想講太多，唯一唔好意思係影響咗人哋嘅生活。（影響發展？）未公布大家都唔好亂估，我有分數，小弟唔細，等我公布先真。（公布會唔會已經結婚？）最好係大家估我唔到，唔係我好難做嘢。（減少夜蒲？）我一向都好少蒲，嗰晚係New Year Party同成班朋友一齊過。」
冇話過阿佘翻撻無望
提到前緋聞女友佘詩曼送祝福，嘉穎稱：「好朋友祝福對方係正常，我都祝福佢。（同阿佘翻撻無望？）我同阿佘都冇咁講過。（薛家燕話你哋眼神有交流！）我都搲晒頭，家燕姐都係出於關心，多謝大家關心我嘅感情生活，leave me alone。」劇中打到飛起的嘉穎可擔心傷患﹖他說：「報道誇大啫，依家只係膝頭韌帶拉傷，拍動作戲會紮住上陣。（同謝安琪有咀戲？）好輕微，都有咬、有咀嘅。」首次拍劇的又南昨日現身時面上爆瘡，他說：「之前皮膚敏感，已經好番好多。」
此外，嘉穎、謝安琪等將於四月中隨《殭》劇組到荷蘭拍攝，除了浪漫場面外，亦不乏打鬥鏡頭。
|
鍾意就快D Share啦！
|
|
|
