2015年1月14日 星期三

[FACE - 399] 最懷念叮噹的法寶 MF,




全知言

最懷念叮噹的法寶

即使資深配音員林保全離開咗大家,但佢把叮噹聲大家永遠記得(雖然家陣叫多啦 A夢),人人對叮噹有份「情意結」,全知言本週就問咗一班藝人朋友,最想擁有邊樣叮噹法寶,人人都各有所好,不過阿 Yu就精明得多,揀咗叮噹百寶袋,仲話想要咩就有咩喎!

崔碧珈 記憶麵包免背書

我會想要記憶麵包,以前細個睇過讀書要記好多字,會記唔到,咁將個麵包吸落啲字度,啲字就會印咗落麵包,你食咗佢就會記得。如果有呢個法寶就可以幫助我拍戲嗰陣背晒所有劇本,慳時間又唔使睇,仲飽肚添!

泳兒 隨意門慳時間

我想要隨意門。因為有時好早要做嘢,要預個車程,如果有隨意門就可以瞓多啲,去旅行仲可以攞多幾日假,慳番搭飛機嘅時間!

Yu 貪心乜都要

如果要揀多啦 A夢嘅一樣法寶,得一樣又點夠,所以梗係揀佢個百寶袋,咁就可以乜都有,隨意門都喺百寶袋度攞出來,所以都係會揀百寶袋。

陳慧敏 竹蜻蜓最自由

我會揀竹蜻蜓。因為細細個見到多啦 A夢同大雄,只要戴上竹蜻蜓就可以由窗口飛出去,我好渴望嗰種自由自在嘅感覺,仲成日用一張紙條剪開兩邊,摺埋扮竹蜻蜓。

Bob 放大電筒照金幣

我最想擁有嘅法寶係放大電筒,因為竹蜻蜓、隨意門實有好多人講,兼且對於我嚟講都冇乜用,但放大電筒就好好,因為我身體上某啲部分比較細小,想照一照將佢變大啲,屋企又有啲金器,你去買個金幣返來,照一照佢就可以變大,佢自己變大變重,我覺得咁都幾正。

小肥 為食要食物桌布

大家知道我叫小肥,肥仔係好鐘意食嘢,咁我就希望得到食物桌布,佢哋有時出去冒險,需要食嘢時,多啦 A夢就會攞塊食物桌布鋪喺枱面,然後話食乜就 bling出嚟,而且咩都有,仲好好食。

街坊最愛時光機

一班街坊嘅意見相對就簡單得多,來來去去都離不開隨意門同時光機嘅選擇,講到尾都係貪佢夠方便啫!

Lawrence

我會揀隨意門,因為有咗隨意門之後,返學就唔會再遲到,起身就可以去到返學嘅地方。最緊要𠵱家嘅世界全球一體化,可以慳番好多時間去想去嘅地方,好似去美國開會就可以慳番十幾鐘頭嘅飛機時間。

Alan

我會揀時光機,因為時光機可以回到過去,假如我哋做錯啲事,就可以利用時光機回到過去,唔會因為自己錯誤而令自己後悔。



鍾意就快D Share啦!