掃呢頁CODE去手機

2015年5月28日 星期四

邱達根:六千萬打造新荔園! [壹週刊 - 1316 - 財經] 邱達根,M1,



甚為玩得的邱達根,在新荔園即將進駐的位置(白色帳篷)外,跳起拍照。他指重開荔園,是他做過最開心的生意。

壹週人物

邱達根:六千萬打造新荔園!

「荔園小天地,最多快樂陪住我哋。」

當年麗的電視兒童節目主題曲再次響起,荔園,返來了。

今年三月,一代娛樂大亨邱德根突然在家中暈倒後離世,兩個月後,孻仔邱達根宣布重開荔園,投資六千萬元,將父親的代表作之一,在中環海旁重現。

父親離開兩個月,邱達根在訪問中仍語帶哽咽,為他呈上這份遲來的「禮物」。

四十歲的邱達根,自小得父親寵愛,帶在身邊,年紀輕輕已接掌上市公司遠東控股( 36)。

典型的富二代,醉心資訊科技,意氣風發之際,卻捲入官司。蟄伏數年,邱達根帶着集體回憶重踏舞台。當年的少爺仔,如今為三子之父,磨走菱角,科技達人變身歡樂大使,成為本週最紅人物。

樂園未開,回報未知,已先贏一仗。

禮物•遺憾

上週四,邱達根以荔園主席的身份召開記者會,宣布新荔園將於六月二十六日,在中環海濱重開。樂園佔地二十萬呎,設有五十個遊戲,包括數個荔園的經典遊戲,如鬼屋及旋轉木馬等,甚至大象天奴,亦會以機械身重生。

記:重開樂園是誰的主意?為何有此計劃?

邱:一路以來,在家庭聚會中,父親不時口噏噏想做番荔園。佢喺我眼中係個創業家,成日想開新嘅生意,新嘅業務,佢睇到其他遊樂場,感慨話我哋都應該留番荔園嚟做。到○五年,政府曾就發展欣澳展開諮詢,我做咗個 proposal,同爸爸講,不如試吓喺嗰度起番樂園,但後來政府因環保問題收番塊地。

記:爸爸對新荔園有何要求或意見?

邱:去年底,我發現可以租到中環塊地,專登帶佢去國金軒食飯,嗰度望到塊地,當時 AIA做緊(嘉年華),想俾佢睇吓。爸爸強調新荔園要與時並進,有多啲新嘢,唔可以令人覺得冇進步。如果佢仲喺度,一定俾好多意見,佢會有好多諗法。

記:爸爸看不到樂園開幕,成為遺憾?

邱:係。當個 plan出來,有幅地圖,已趕唔切俾佢睇。但佢知道幾時開,我叫佢 mark低,當時話你記得來。(語帶哽咽)我相信佢覺得我有能力做到。

記:除了荔園,爸爸還曾計劃在荃灣川龍地皮重開宋城?

邱:唔係宋城,係想起《紅樓夢》嘅大觀園,同埋荔園,佢不嬲鍾情中國文化。

上週四,邱達根(中)在記者會上宣布重開荔園,吸引逾百傳媒出席,合作夥伴翠華( 1314)主席李遠康(右一)亦出席撐場。(鄭樹清攝)

邱德根六一年買入荔園,投資擴建,將樂園帶入全盛時期,他曾指

荔園是一盤很賺錢的生意。後來,在其他主題公園的競爭下,荔園生意下跌,於九七年結業。

起跌•天使

孻仔孻心肝,深得父親寵愛的邱達根,三十歲不到,已出任家族三間上市公司之一的遠東控股(當時名為遠東科技)的董事總經理,進攻資訊科技市場。一○年,邱達根惹上官非,被控於○七年時,違規向父親借出六千多萬元貸款。審訊期間,邱達根辭去上市公司所有職務,轉趨低調,一二年獲判無罪。邱現仍持有約一成八遠東控股股份。

記:打造新荔園的資金,是個人或家族投資?

邱:係我個人嘅 project。當然我開始嘅時候,個個阿哥都有通知,佢哋都話:「好呀,好呀,你去搞吖。」

記:何不以上市公司名義發展荔園?

邱:暫時不會。因為 short term形式唔適合放入上市公司,會計師問數都問到你傻,冇可能計到。如果有長遠計劃先再諗。

記:經過單官司,你有何體會?

邱:係一次好好嘅經驗,擔心一定有。當時老豆同我講:「驚咩呀?你又冇做錯嘢,我都打過唔少官司啦。」那次官司,令我有個機會去 replan自己嘅人生。人總有起起跌跌,那一刻先諗自己真正想做咩。可以話因為咁,所以我先搞荔園。

記:離開遠東後在做什麼?

邱:我自己有個天使基金,投資早期嘅資訊科技公司,香港、大陸及以色列都有,幫佢哋發展。今次荔園,會加入一啲用科技來玩嘅遊戲。依家嘅樂園,係咪仲係硬邦邦擺喺度?點都要同你嘅生活,如手機,有互動,離開樂園後,仲可以玩同交流。但因為審批問題,今次只係做到少少。

邱達根是香港資訊科技聯會會長,手上戴的是最近大熱的 Apple Watch。

讀小學時的邱達根,每逢週末都隨爸爸到荔園巡場,最愛玩碰碰車。

他指爸爸要求樂園整潔、乾淨,甚至會親自執垃圾。

兄弟•巧合

邱德根有兩個老婆。第一任妻子裘錦秋為他生下四子一女,後遇空難去世。邱再迎娶亡妻胞妹裘錦蘭為繼室,生下三名兒子,包括邱達根。在父親安排下,兩房子女分庭抗禮。上月底,長房次子、花名「老虎仔」的邱達昌,宣布向通訊局申請免費電視牌照。兩兄弟,不約而同走上父親的舊路。

記:同一時間,哥哥搞電視,你搞荔園,是時機促成或其他原因?

邱:絕對係巧合,(收起笑容)因為我哋都冇預計到爸爸會突然過身。(低頭抆一抆嘴,聲音略震)我哋都想爸爸喺度㗎。

記:你和大房兄姊的關係如何?

邱:爸爸係個好重視家庭嘅人,個個星期都會聚會,食飯、見面。咁多個哥哥,對我來講都一樣。出面用一房二房來形容(有不和傳聞),我哋不嬲無澄清,其實你睇番我哋屋企嘅 history,大媽咪同媽咪係兩姊妹,關係好好。大媽咪不幸過身後,爸爸再娶媽咪,所以,一、二房係咪 apply到呢?

記:爸爸如何影響你?你和爸爸名字中都有個「根」字,特別寵你?

邱:佢嘅座右銘係自強不息。佢有種威嚴,大家兄弟都驚佢,但佢唔會管我哋,唔會打仔。我讀到中六先去外國,啲阿哥就十一、二歲就出去讀書。另外,我長大嘅時間,佢年紀大啲,冇之前咁搏殺,尤其是 ATV之後。到佢七、八十歲,成日會同我哋講吓笑,係一個幾好玩嘅人。至於個名,我估佢改到悶悶哋,七個仔,呵呵。佢最後都冇答到,點解將佢個名俾我。

邱達根(中)母親裘錦蘭(右)是邱德根(左)第二任妻子,他指和所有哥哥、家姐都相處融洽,沒有一、二房之分。

邱達根在青山公路油柑頭的大屋長大,是陪在父母身邊時間最多的一名兒子。

新荔園免費入場,部分遊戲須使用代幣,由一至十個不等,每個十元。(鄭樹清攝)

鍾意就快D Share啦!