掃呢頁CODE去手機

2015年5月28日 星期四

搣少少 撇大台吸千萬 胡杏兒 60萬排洪 [壹週刊 - 1316] 杏兒,胡杏兒,M1,



探熱針

搣少少 撇大台吸千萬 胡杏兒 60萬排洪

鐵定不再續約大台的胡杏兒,頻頻推公司 job,留番啲心機、時間拍拖同返內地掘金;商演、綜藝節目、拍劇冇停手,唔夠一年,已經進賬過千萬人仔。

荷包脹!胡杏兒決定「排洪」,搣少少出嚟買嘢獎勵自己。上週三(五月二十日),胡杏兒到銅鑼灣試 Land Rover Discovery Sport 2015版,夠「飛士」的她更在幾百個訂購名單中獲優先出車,將六十萬新玩具,快人一步到手。

驗屍咁驗

試車當日,一身白衫的胡杏兒在友人陪同下現身 Land Rover位於銅鑼灣的陳列室。一到埗,胡杏兒雙眼便未有離開過新鮮到港的 Discovery Sport 2015版新車,聽過 sales講解,便立即跳上司機位試坐,之後環繞車身走兩圈,再擒高踎低,天窗車頭尾燈包圍,逐一驗屍咁驗。

「呢架 Discovery Sport結構源於 Evoque,外形亦有八成似,但車價差成廿幾萬,性能同質素都好好,所以一開賣,已經收超過三百張訂單。」一名車行的經紀說。

胡杏兒睇到入晒神,直至 sales通風報訊表示有記者,她才左穿右插避開鏡頭。在停車場試完車,胡杏兒決定揸出街進一步測試性能。據了解,車行優先讓胡杏兒插隊,所以不消半小時,她便拍板買入六十萬有找的白色 Land Rover Discovery Sport,新玩具下星期便到手。

胡杏兒在陳列室分別睇過 Land同 Range Rover,最後拍板買入 Land Rover的 Discovery Sport,六十萬有找。

坐上司機位的胡杏兒,對新車愛不釋手。

除了在停車場試車,胡杏兒再將心水的 Land Rover揸出街走一轉。

胡杏兒搵兩名友人傍實,為買新車俾意見。

拍劇廿萬一集

同 Philip Lee拍拖後,胡杏兒頻頻推大台 job,連新劇《 EU超時任務》都拱手相讓予朱千雪,其實大雞唔食細米,過去一年,胡杏兒有份演出的《奇妙的朋友》,在全國同一時段收視 No.1,帶挈她商演密密接,賺到笑!之後胡杏兒會同袁詠儀合演四十集內地劇《領養》(劇酬每集二十萬),唔夠一年,已賺過千萬人仔。

大台「雞碎咁多」,既然已決定離巢,胡杏兒當然唔使俾面!

今年 2月參加內地綜藝節目《奇妙的朋友》,餵飼猩猩 BB時被對方咬傷。

同 Philip蜜運中的胡杏兒,近日主力拍拖,為做人妻作出準備。(《蘋果日報》圖片)

抵玩

今年三月登陸香港的 Land Rover Discovery Sport,其中 SE為頂級版,售價$559,000,一面世已接過 300張訂單。

價錢吸引外,馬力有 240匹,波箱配搭是 ZF九前速自動波,扭力高達 34.7kgm,車廂設有中控台 8吋輕觸式屏幕,與泊車鏡頭連線,還有導航、四個電源插座及六個 USB充電插頭,同時亦用上最高級別的 Perforated Grained皮革。

至於車架方面結構源於 Evoque,但車價卻平二十多萬。 Discovery Sport具有五座位及七座位,五座位後座空間闊落,座椅可根據需要收摺,行李箱正常容量高達 981公升,亦可將後座翻低,增至 1,698公升。

鍾意就快D Share啦!