「爹哋教我唔好忘本」超盈接班做酒店大亨
賭王何鴻燊淡出賭業，眾子女按部接棒，四房千金何超盈現協助母親梁安琪管理酒店及在澳門開拍賣所項目。超盈愛時裝、藝術，四太就以酒店作為平台給她「開竅」發展，而她更修讀MBA裝備自己。有着一對生意精明頭腦的賭王父母絕對是雙刃刀，賭王已畀定貼士要識用人不忘本，超盈更讚母親是獎罰分明的super woman。
賭王何鴻燊與四太梁安琪的大千金何超盈自小已在傳媒焦點下成長，將於本月底滿25歲的她，原來去年靜靜地已按部就班，協助母親四太梁安琪打理酒店拓展業務、地產生意及成立拍賣行等工作。超盈日前在其中一個翻新項目、澳門的麗景灣酒店接受本報專訪，大談家庭與工作。未幫手家族生意前，超盈亦曾做過銀行、律師樓的暑期工，印象最深刻在17歲做過法官助理：「喺高等法院幫人沖咖啡、影印，又要去法庭聽案件。」
【新女強人】
■賭王千金超盈自去年起協助母親四太梁安琪打理酒店業務，日前她在工作的澳門麗景灣酒店接受本報獨家專訪，大談家庭與工作。
攝影：葉君海
【四房全家】
■賭王與四太梁安琪所生的四名子女漸成長，超盈與猷亨現已開始協助打理家族生意。
【嬌俏四太】
■女強人四太也有嬌俏的一面，那些年帶着2歲大的超盈去迪士尼。
以藝術注入生意
提起四太掌管的家族生意，即聯想到賭場業務，超盈卻以酒店項目為起步點，她表示：「自己鍾意藝術，畫油畫，媽咪覺得我唔應該淨係想做畫家，知我既然鍾意藝術畫嘢，建議我將藝術元素擺喺酒店生意，會發揮更好。」超盈本身在香港大學修讀藝術，因要開始接手搞酒店管理，亦到了瑞士進修MBA課程：「好幸運喺自己公司做嘢，可以一對一請教，問則師劃CAD圖、視察地盤、開會，要由基層到管理層做上去，都係一路做一路學，要知同事做緊乜，又唔可以乜都要問人。」
■超盈視賭王為人生偶像，又大讚母親四太是super woman。
■超盈的辦公室牆上，掛着一幅自己三年前親手畫來送給賭王作生日禮物的畫。
之前已促成引入時裝品牌Karl Lagerfeld及Versace在澳門起酒店，超盈更爆老佛爺與四太阿媽洽談的趣事，她表示：「佢係一個好嚴謹、堅持自己風格嘅人，見到媽咪用開好舊嘅Nokia電話，問點解唔用iPhone，更送咗一部畀媽咪，不過媽咪唔捨得用，同埋Karl影相一定要戴黑超，但佢簽文件嗰時又要戴reading glasses。」超盈現忙翻新充滿葡式舊建築物風格的麗景灣酒店，已想好新的構思：「𠵱家同保利搞緊拍賣會，自己想做多啲青年工作，所以出年會喺呢度搞第一次酒店藝術博覽會，會喺每間酒店房擺啲新晉藝術家作品。」
到訪超盈在澳門的辦公室，有童心未泯的Chanel熊仔figure，亦擺了不少賭王父母及弟妹相，更有一幅她筆下與父親跳舞的畫作，視父親為人生偶像。父母做生意均出色，在她眼中更是超人：「爹哋做老闆冇架子，平易近人，佢成日教我唔好忘本，佢對員工好好，好多員工都唔捨得走，佢話用人要叻，搵忠心嘅人，一個忠心嘅夥計會慢慢幫到你，有一個叻團隊做生意好緊要。」
■超盈今年在瑞士修讀的MBA課程畢業，返港即再着畢業袍與賭王慶祝。
■超盈3歲時的肥嘟嘟童年相，可愛賣萌。
讚四太賞罰分明
對於直屬上司兼母親，她笑言：「佢要不斷做嘢坐唔定，一諗到idea要即做，唔可以得閒，但佢係一個好嚴老闆，試過我開會遲咗半個鐘，佢當住所有人話唔使我開，叫我出番去，嗰刻覺得尷尬冇面，知佢用心良苦，教識我要專業，做生意要一視同仁，佢做嘢唔啱即鬧，唔會婉轉好直接，不過做啱都會讚，賞罰分明。」問到會否準備做接班人，超盈就笑言：「佢太叻，覺得我未必可以一個人接晒，自問冇媽咪咁勤力，同佢辦事能力好高，我覺得要加埋細佬妹至可以接佢班。」
採訪：梁錦雯
【大晒珍藏】
■超盈近年熱捧內地當代畫家，如歐陽春的《瘋狗》及她手持陳可筆下的《大鼻子》。
【千萬名畫】
■今年4月，超盈代母以1,180萬買下大師級吳冠中《長江三峽》的名畫。
|
鍾意就快D Share啦！
|
|
|
