掃呢頁CODE去手機

2015年12月24日 星期四

照抄霆鋒搞製作公司 陳家樂湊客拍片做阿四 [壹週刊 - 1346] 霆鋒,陳家樂,M1,謝霆鋒

週日(20日)下午,陳家樂以製作公司老闆身份,為客仔拍婚禮片段。娛樂偵訊照抄霆鋒搞製作公司 陳家樂湊客拍片做阿四英皇旗下藝人陳家樂入行超過10年,去年終於撞到個機會,在電影《破風》「一炒成名」。多年來半紅不黑,三年前已經搞副業開製作公司,接拍婚紗照及廣告。最近陳家樂更加老闆變阿四,落手落腳做埋攝影師助手,十分進取。拋頭露面派傳單週日(十二月二十日)下午,記者發現陳家樂一行數人,由北角碼頭坐小輪過觀 ...


週日( 20日)下午,陳家樂以製作公司老闆身份,為客仔拍婚禮片段。

娛樂偵訊

照抄霆鋒搞製作公司 陳家樂湊客拍片做阿四

英皇旗下藝人陳家樂入行超過 10年,去年終於撞到個機會,在電影《破風》「一炒成名」。多年來半紅不黑,三年前已經搞副業開製作公司,接拍婚紗照及廣告。最近陳家樂更加老闆變阿四,落手落腳做埋攝影師助手,十分進取。

拋頭露面派傳單

週日(十二月二十日)下午,記者發現陳家樂一行數人,由北角碼頭坐小輪過觀塘海濱長廊,為客人拍攝婚禮片段,既是老闆又是藝人,陳家樂冇繑埋手,做攝影師助手又搬搬抬抬,一直做到黃昏才收工。

現年廿九歲,○三年入行的陳家樂,工作量長期低水,出席公司活動順理成章靠邊站,只間中出現同公司的容祖兒、 Twins、洪卓立等 MV做老臨,直至最近,才有機會孖住英皇新人陳凱彤出 EP。要搵路行,三年前陳家樂決心效法師兄謝霆鋒,同幾個朋友每人投資二十萬,開了間製作公司 Butter Jam。

「間公司規模係蚊型乜都要自己做,因為請多個人就多一份負擔,頭半年接唔到生意,佢哋就試吓去婚紗展擺檔,家樂自己派傳單、 sell客,啲人見到會好奇幫襯。不過都唔係咁簡單,公司其實都有微言,所以家樂都用咗唔少時間,說服英皇接受佢喺出面拋頭露面湊客。」知情人說。

與同事由觀塘碼頭拍到海濱長廊,陳家樂跟在攝影師旁做跟得阿四,邊做邊學。

客仔企唔啱位,陳家樂肉緊指導對方。

拍拖食特價壽司

唔想一闊三大,就算身為老闆,陳家樂慳得就慳!日前記者便發現他孖住拍拖快一年的長腿 model女友余香凝( Jennifer),到沙田排隊食消夜時段的特價壽司,其間,更當街啜啖女友面珠。「我同女友感情都好穩定,出年都三十,係有諗過結婚,依家開始搵錢買樓俾自己同媽咪,所以要搵外快。食特價壽司唔係純粹貪平㗎!食清啲可以 keep fit之嘛!」陳家樂在電話回應說。

兩年前,陳家樂轉到英皇電影部,去年拍住韓星崔始源、彭于晏演出電影《破風》,拍攝期間更因炒車跌斷鎖骨,但因禍得福,引來傳媒關注,日前又憑電影《幸運是我》攞了澳門國際電影節「最佳男配角」,捱咗咁多年,終於轉運。

另一晚記者發現陳家樂偕 22歲 model女友余香凝,在沙田排隊吃特價壽司,其間他旁若無人啜了女友面珠一啖,十分甜蜜。

前年轉入英皇電影部,早前陳家樂便憑電影《幸運是我》,膺澳門國際電影節「最佳男配角」,飾演他媽媽的惠英紅大熱封影后。

《破風》集合中、韓、台星演出,估唔到陳家樂因炒車斷鎖骨,成為焦點。

搵路行

半紅不黑往往最慘,收入少又要顧住身勢,入不敷支,好多藝人都會做秘撈,又或者同人夾份做生意搵外快,成功例子亦有唔少。

譚小環

在無綫 18年月薪僅萬八,去年三月,小環同老公蔡強榮及友人合資百萬,在銅鑼灣渣甸坊開魚蛋小食檔,由港姐冠軍變魚蛋妹,一舉成功準備開分店。

梁靖琪

身為前無綫高層梁家樹寶貝女,父親在位時, Toby已謀定退路做 wedding planner,古巨基、錢嘉樂、周家蔚等圈中人的婚宴,均由她一手包辦。

金剛

早前捲入台灣槍擊案的金剛,雖然是志偉黨而被余詠珊打壓,人氣大減更被指輸百萬波數,但有貴人帶挈,拍住黃又南、喬寶寶在果欄做生果、大閘蟹批發,財來有方。

撰文、攝影、攝錄:娛樂組


鍾意就快D Share啦!