梁思浩真係一個奇人。12年前無綫請佢食豉椒炒魷，梁思浩話，當年無論點樣苦苦哀求，無綫都唔肯俾佢留低。估唔到就係咁，梁思浩發咗達。《娛樂審死官》長做長有，食幾家茶禮，就連甜品都撈埋，依家該甜品店北上發展，梁思浩由六叔邵逸夫生前愛將曹眾拉線之下，將甜品店大陸經營權賣俾大陸飲食女王王慧敏，梁思浩稱，作價一億。
嚟緊王慧敏計劃喺大陸開380家分店，遍佈100個城市。梁思浩接受周刊訪問時就話，如果真係開到380間，一個月分番一萬，咁就有380萬，嘩，咁真係好和味喎!仲好過佢中咗兩次六合彩添!
其實梁思浩投資呢家甜品店已有12年，嚟緊會喺香港開第5間分店。除咗北上開店，梁思浩亦染指澳門，不過都係以出售特許經營權形式，由賭王四太梁安琪投得。
醒目嘅梁思浩呢頭賣咗大陸同澳門嘅經營權出去，嗰頭入番股，佢自己就話股份唔太多，又話會親自返大陸監控原材料同製作過程，仲係全部由香港人負責，確保食物質素咁話喎。真係執行喺上嚟，就知道「國情」是甚麼一回事喇…
梁思浩仲話，啱啱用咗2千萬，投得日本一隻朱古力餅嘅香港代理權，出年6月喺中港兩地有得賣。
家陣梁思浩儼如甜品大亨咁款，無綫真係有錢都請唔番佢啦，點知佢喺訪問中竟然話，如果曾勵珍同余詠珊邀請佢嘅話，佢唔收錢都願意返無綫喎。
講呢啲？
思浩回覆本報時說：「聯營權賣咗幾多錢就唔方便講啦，總之非常滿意，亦都多謝四太嘅賞識，做人係要喺邊度跌倒就要喺邊度起番身，即使有挫敗，只要努力，一定會成功！」
|
鍾意就快D Share啦！
|
|
|
