劉鑾雄大仔劉鳴煒早前上港台節目《我係乜乜乜》，由於package高分被港女封為男神，但港女冇行啦，事關男神宣告封盤，新歡是來自摩根大通任客戶投資組合經理的金融界之花奚倩雯。至於男神為女友可以有幾盡？便是甘心由半山千呎豪宅搬落跑馬地400呎斗室，以往慣性將感情生活密冚的他，回應本報時笑笑口說：「多謝晒！」似乎跟新歡好甜蜜！
劉鳴煒身份、言論離晒地，但日常行為卻堅貼地，平日除了坐地鐵啃飯盒，生仔亦選公立醫院，感情生活未及父親高調，近日同樣備受外界關注。昨日就有周刊報道劉鳴煒正式由「單身」轉為「交往」mode。新歡是來自摩根大通任客戶投資組合的金融界之花奚倩雯（Estella）。
曾留學進修
現年約30歲的Estella，畢業於港大經濟和財務學系，其間曾到阿姆斯特丹進修。外形方面，Estella樣貌清秀並留有長長直髮，身形高瘦，跟高大健碩的劉鳴煒甚為匹配。報道指二人在去年中一個飯局認識，由於Estella為人健談又靚女，劉鳴煒因此對她留下深刻印象，沒多久就開始單獨約會兼拍拖。
為了保護這棵愛情幼苗，本身住在半山豪宅豪園的劉鳴煒，寧願屈就搬到原作投資之用的跑馬地嘉樂居400呎單位，以避記者耳目，亦方便女友上門食飯撐枱腳。而平時喜愛撚幾味的劉鳴煒，更會親自下廚餵飽女友。本報記者昨日致電劉鳴煒，對於他和Estella蜜運，他沒有否認並笑說：「我冇嘢補充啦，同埋我啱啱要落車，所以……辛苦晒啦，辛苦晒，多謝晒，辛苦晒！」隨即匆匆掛線。
對女友溫柔
與新歡拍拖一年的劉鳴煒，雖然竭力將戀情密封，但其實二人拍拖不久，已不時露出蛛絲馬迹。去年9月，Estella在facebook更新個人頭像，劉鳴煒不避嫌的「讚好」。一個月後，二人被雜誌拍得現身中環ifc，在商場人多時雖然行到離行離列，但行到僻靜處，劉鳴煒即和女友面對面傾密偈，只見平時雙眼炯炯的劉鳴煒，對着女友眼神卻變得含情脈脈，一副冧樣，就知女友在男神心目中地位超然。至近日，二人已不時出雙入對，日前更被拍得在午飯時間結伴出外午餐，情侶關係逐漸浮面。
觀乎劉鳴煒多年來擇偶條件，均着重女方內涵而多於外表，當年21歲早婚的他，與樣貌平凡的英國大學同學Wendy結婚後，誕下一對龍鳳胎，至六年前離婚。翌年被周刊影到的新歡，外形與打扮亦同樣普通，而今次的Estella，不但學歷高，外表不俗也懂得打扮，是歷年最標青一個。
採訪：王梓嫚
|
鍾意就快D Share啦！
|
|
|
