杜如風父親、嘉禾前宣傳廣告部主管杜惠東，今晨因腎衰竭離世，享年75歲。獨生女兒杜如風(Helen)原本在日本為TVB拍旅遊節目，上星期亦急急趕回香港，父親離世時亦陪伴在旁。Helen接受《蘋果》電話訪問時表示，仍難掩傷痛，她稱：「爹哋生前講過，(我)努力工作就係對佢最好嘅回報，所以遲啲會過去日本拍埋餘下部份。」她透露父親是上星期因身體不適入院，並謂：「爹哋早幾年已經要洗腎，上星期入院之後情況都唔係咁好，今朝早走咗，好安詳。」Helen為了令父親安心及不影響工作進度，故她稍後會繼續節目拍攝。袁詠儀得悉杜Sir死訊後，也難過地謂:「佢人好好，我哋做宣傳好笑容，佢一定會企喺身邊陪我哋做訪問，佢係宣傳部高層同老臣子，但從來唔擺款，希望佢家人節哀保重啦!」人稱杜Sir或阿杜的杜惠東，在娛樂圈浸淫逾40年，在圈中人緣甚廣，曾就讀廣東師大中文系，71年阿杜任職港聞突發記者，72年底轉到娛樂版，同時也兼任攝記、編輯及寫手工作。至74年開始在周刊做攝記和寫手，並在八份報章寫專欄。76年阿杜被嘉禾電影公司羅致，擔任宣傳廣告部主管，服務嘉禾逾30年期間，與張曼玉、林青霞、鄧麗君及鍾楚紅等明星交情甚深。杜Sir生前曾推出多本著作，包括《城市浪人》、《浪子酒廊》、《東言西語》、《巨星食譜》等。2010年，杜Sir在書展推出大爆巨星秘史之作《繁星閃閃》，提及阿梅、成龍、林青霞、鄧麗君、王祖賢和狄娜等人的軼事及情史，推出後招來非議，及後杜Sir笑言對於被插毫不生氣，反稱有人小事化大，趁機搞事。
|
鍾意就快D Share啦！
|
|
|
