謙謙楊怡錯過洞房買料補精力
羅仲謙與楊怡前日大婚之喜，忙足全日後昨日一臉倦容現身，同聲表示因太攰而錯過春宵一刻！兩人離開後未有返愛巢，反而往街市買靚牛肉，準備晚上去「滾」，同時為造人大計先行進補一番。婚宴上，謙謙扮鬆弛熊唱情歌冧老婆，令阿怡感動爆喊，她昨日自爆曾一度以為是林峯扮，最後憑一雙皮鞋才認出老公。
藝人羅仲謙與楊怡結束六年愛情長跑，前晚在酒店筵開52席，邀請大批圈中好友前來「婚」享喜悅！一對新人忙足一整日，直至昨晨2時多才返抵酒店房，難怪休息到昨午3時許才離開！謙謙與阿怡以黑白情侶裝打扮示人，雖戴上黑超但仍難掩疲態，同聲表示攰到爆，結果連洞房花燭夜亦有心無力，認真浪費！
摸Kay大肚沾喜氣
一直講到出口趕生BB的謙謙，提到春宵一刻也錯過，他一臉無奈地說：「我一撻落床就瞓咗！」阿怡則表示攰到腳抽筋，腳趾也疊在一起：「呢啲（洞房）都係儀式啫！過埋今日先，仲有好多嘢要做，依家好似做完個大Project咁，真係要抖抖。之後都各有各忙，我都要做舞台劇。」對於謙謙即將赴內地開工至3月，搞到新婚半個月後便要分開，阿怡透露稍後要為舞台劇綵排，故應不會到內地探老公班，但不擔心老公有艷遇。問到長輩可有催生BB？阿怡笑言連朋友都有催，故在喜宴上趁機摸身懷六甲的謝安琪（Kay）肚皮，一沾「喜」氣。婚宴期間又舉行一個為謙謙及阿怡將來小朋友的改名比賽，結果由兒子名字「羅庚」與女兒名字「羅曼蒂」勝出。
新婚後的第一日，謙謙急不及待往「補身」，為生仔做好準備！兩人離開酒店後，謙謙當「柴可夫」載阿怡到九龍城街市，原來是到相熟的牛肉檔買牛肉。當時肉檔有不少客人排隊，但老闆甫見熟客仔即招呼他上前，但謙謙仍守規矩繼續排隊，不消一會便花了三百元買到靚牛肉！他透露將於晚上與家人打邊爐輕鬆一番，最後驅車返回大埔愛巢。
誤當老公係林峯
前晚的婚宴特別多感人位，高潮一刻當然是謙謙扮鬆弛熊驚喜現身一幕！他又唱出《分分鐘需要你》冧老婆，搞到阿怡忍不住爆喊，她回味說：「真係幾驚喜！開頭問佢有乜嘢驚喜可以畀我同啲賓客，佢話冇！我叫佢唱歌又話冇練唱唔到。原本林峯話嚟唔到，點知最後嚟到，跟住隻熊出現，心諗嚟到已經好好，使唔使扮熊呀？點知望吓對腳先知係佢（羅仲謙）！其實簽字儀式都好感動，因為我哋好少講到結婚誓言內嘅嘢，啲姊妹都話未試過咁感動，喊完又喊！」
文：影視組
攝：追蹤組
|
鍾意就快D Share啦！
|
|
|
