大劉唔介意甘比嘅記者身份，為咗追求佢仲管接管送獻殷勤，只要甘比做完採訪活動，如果嗰日大劉有時間，都會親自揸車到會場嘅後門等佢收工，然後接佢去食飯；當年有同事曾目擊大劉揸車送甘比返將軍澳工業邨，去到《蘋果》大廈附近時甘比就落車，然後自己再步行一小段路返公司，當年同事以為大劉只係單純載甘比，完全唔會想像佢哋拍拖。大劉雖然有錢，但為咗追求甘比，佢出動嘅並唔係金錢攻勢，當年韓劇《藍色生死戀》喺香港掀起熱潮，甘比都係忠實擁躉晚晚追劇，同事聽到甘比話要趕返屋企煲劇，後來才知到原來係大劉陪佢睇《藍色生死戀》。當年喺《蘋果》月入1萬多元嘅甘比，單獨租住面積僅250呎北角舊樓，有同事上過佢屋企，只有一廳一房，客廳有一張小小嘅雙人梳化，由於佢哋拍拖期間唔想畀人知，為咗盡量低調，通常大劉都係去到甘比屋企共度二人世界，身為大男人嘅佢，估唔到為o氹甘比竟肯陪睇婆媽劇。不過，當時大劉同呂麗君剛開始咗三個月，之後先邂逅甘比，而甘比完全唔知大劉同時有另一個女友呂麗君，其後呂麗君去咗英國讀書，大劉可以專心同甘比發展，甘比亦被大劉嘅誠意感動，直至煲到套劇播完，兩人感情更加升溫，而住慣豪宅又身型大隻嘅大劉，唔知係咪頂唔順蝸居，安排甘比搬去跑馬地居住。
來源 source: http://s.nextmedia.com
|
鍾意就快D Share啦！
|
|
|
