(新增訪問內容)換上中式裙褂嘅香香岑麗香同強強，向完父母斟茶後，就正式同傳媒做訪問，講到今晚會喺酒店擺30圍，招呼好多教會朋友同埋香港專程飛過嚟觀禮嘅賓客。強強同強嫂坐定定接受傳媒訪問，「恭喜晒」「恭喜晒」之聲不絕，香香亦連聲答道:「多謝晒!辛苦晒咁多位!」心情呢？「今朝喺教堂行禮，因為地方比較細，所以大家都好close。」然後香香再興奮地謂:「啱啱正式結咗婚lu!」咁即係叫咩太呢？有記者笑言嗌「強嫂」，香香即笑不攏嘴，似乎對呢個稱呼都好受落喎!之後香香補充謂:「叫香香都得嘅!」記者改為問強強平時點樣嗌香香，因為強強中文唔太好，一時get唔到，向香香求助。答案係:「叫佢？就叫香香囉!」笑得好sweet呀!但依家身份唔同咗喎，強強就答:「我喺屋企就嗌佢蕉蕉嘅!」語畢大家都忍唔住狂笑，強強好cute啊!問到俾老公幾多分，香香就話：「梗係100分！」至於今早接新娘環節，香香就話：「係呀，辛苦佢哋7個男仔，答好高難度問題，好大犧牲，爭啲嘴對嘴，又要食紫菜，我喺後面睇，佢哋仲要腳趾食提子，辛苦你哋」強強即插嘴話：「唔係我哋，係辛苦我呀！」記者問強強有冇埋怨老婆？點知強強話：「都會呀！」現場即時dead air咗3秒……嚟唔切反應嘅香香就「吓」咗一聲，事後強強話今朝接新娘好大壓力……唔知係咪壓力大，抑或廣東話唔多靈光，搞到強強有啲啲辭不達意呢？問到強強老婆香香有幾好，強強重覆3次「好、好、好！」問佢有冇其他形容詞，強強就話自己中文唔好，唔識點講！之後一對新人應傳媒要求，終於甜蜜咀嘴，但當記者起哄話要咀10秒，強強即好大反應話：「吓！咀咁耐？」香香同強強呢pair真係天造地設一對！
| 採訪、攝影：黃曉程、羅德光 | | |
| | |
|
鍾意就快D Share啦！
|
|
|
