名人動態
囝囝勁黐後父 繼女似足姊妹 楊寶玲三嫁一周年
4月便 50歲的 87年港姐冠軍楊寶玲， 94年秘嫁音樂人陳容森後三年離異； 02年跟美國凱撒皇宮賭場市場部亞洲區副總裁黃延年再婚，並誕下兒子 Nathan， 14年夫妻關係告終，一年後，她帶住兒子三嫁，重投英籍初戀情人懷抱。再婚一年多，楊寶玲完全獲兩個繼女接受，兒子亦跟後父好好感情，兩個家庭合一，難得和諧。
繼女好懂事
三嫁的楊寶玲，同現任丈夫兼初戀情人 Gav都曾經婚姻失敗，所以特別珍惜對方。二人各有子女， Gav跟前妻育有兩女，楊寶玲亦有個九歲兒子 Nathan，兩夫婦最希望便是三名子女融洽相處。
月前兩人結婚一周年，上載多張溫馨家庭照到網上放閃。初戀感覺返晒嚟的楊寶玲，將婚照夾併當年同 Gav拍拖的初戀照， sweet爆燈。
同現任老公甜蜜蜜，做人繼母，楊寶玲一樣搞得掂！與兩女拖晒手，完全融合。
半百楊寶玲凍齡功能強，拍埋兩名繼女身邊，只似大姐姐；至於隨母生活的兒子 Nathan，更加黐住後父 Gav，兩個家庭，已合成為一體。
「 Gav兩個女都大，佢哋好懂事，亦好接受 Pauline，大家似朋友一樣，亦將 Nathan當係細佬咁照顧， Nathan同 Gav又好夾，所以 Pauline好放心；之前結婚一周年，成家人加埋一直幫手照顧 Nathan嘅 Pauline媽，一家人一齊去慶祝。」知情者說。
老公遷就搬美國
初戀兜兜轉轉重逢後，楊寶玲老公 Gav為她遷居美國，對老婆錫到燶。
「之前搞到離婚，係因為 Pauline性格外向，但 Nelson（前任黃延年）就比較靜，加上近年要經常返大陸『湊客』，兩公婆聚少離多，更加多磨擦。 Gav好了解同遷就 Pauline，佢寧願遙控啲生意同辛苦啲英美兩邊飛，自己搬去美國，就晒個老婆。」知情者說。
老公經濟條件不錯，加上自己亦儲埋唔少私己，生活無憂，楊寶玲安心在美國做少奶奶。
首任老公
楊寶玲首任丈夫，是來自新加坡的音樂人陳容森， 94年二人秘婚，三年後離異兼反目收場。如今各有家庭，陳容森再娶內地女子，並育有一女。
首位女拔港姐
女拔港姐冠軍，除咗攞十優的麥明詩，其實仲有楊寶玲。就讀拔萃女書院的她，之後到英國史篤城（ Stoke-on-Trent）繼續升學，亦在當地邂逅初戀情人兼現任丈夫 Gav。楊寶玲 87年返港參選港姐奪冠，翌年到英國出戰世界小姐，亦獲得亞洲皇后。之後角逐環球小姐，更加為港姐爭光，得第五名。
成功繼母
傳統觀念，後母都係「好可怕」！但世界唔同晒，圈中亦有唔少成功繼母，面對毫無血肉關係的繼子繼女，隨時比生母花上更多心血時間。
寶島少奶李美鳳
靚爆的李美鳳大把人追，但她偏偏揀了脾氣古怪的林敏驄，兩人在 90年秘密註冊結婚，但婚姻關係只維持五年便結束。離婚後一年，李美鳳改嫁台灣富商鄭翔中，從此做寶島少奶，並誕下一對龍鳳胎，現已十八歲。
育兒專家林穎嫻
季軍兼最上鏡小姐的林穎嫻，當選後即獲無綫力捧，跟郭富城、邱淑貞等位列電視銀河十星之一，星途比冠、亞軍暢順。 99年，與外籍男友 Tom Dupont結婚後長居美國， 04年升為人母，共育有一子兩女。 02年，林穎嫻一度回港為張玉珊任修身代言人， 12年更推出育兒書。
撰文、攝影、攝錄：娛樂組
|
鍾意就快D Share啦！
|
|
|
