今年25歲嘅G.E.M.（鄧紫棋）開到口恨嫁，「宇宙巨星」G.E.M.自嘲：「我係長期都處於寄望有桃花嘅階段。」不過日前佢屋企中一棵桃花竟然跌落地，散到成地桃花，似乎「唔多老黎」，佢仲疊埋心水話：「死咗條心！」但其實有信仰嘅G.E.M.都唔迷信，仲話恨結婚派利是，佢話：「我想快啲有得派利是添！」
恨27歲生B
G.E.M.指爸爸話佢到咗適婚年齡，佢話：「以前嘅社會25歲結咗婚，我媽咪22歲結婚，23歲生我。」佢仲自爆連粉絲都成笑佢恨嫁，話佢係全個娛樂圈最恨嫁嘅女歌手！佢話：「不嬲我都係想嘅，但我唔急嘅！」G.E.M.18歲天真爛漫，本身計劃25歲結婚，27歲生B：「因為我妹妹講過女性嘅卵子喺27歲最健康、最優良。」
唔再活喺愛情小說
咁佢羨慕好姊妹李蘊25歲結婚生女？G.E.M.直認：「羨慕㗎！」佢又讚李蘊全天候24小時照顧囡囡，覺得做媽媽好偉大，仲覺得自己未Ready做媽媽：「我有訪問過我媽咪，佢話其實冇一個人係喺自己成為媽咪之前覺得自己Ready，做媽媽係一路做一路學。」問係咪黐身女友？佢話：「我初戀時係嘅，但之後嗰啲你想見都見唔到。（將來搵個易見到男友？）大個咗就唔再活喺愛情小說入面，以前睇得愛情小說多，真係覺得成個世界得你哋兩個，但現實生活唔係，係要學識點樣關心一個人，唔係淨係我好想見到你，唔見會死，呢個諗法係好幼稚。」
去旅行唔認係G.E.M.
提到新年，G.E.M.最記得入行後第二年名媽咪屋企人參加旅行團去日本旅行，同團有小朋友問：「你係咪G.E.M.？」由於佢真名唔係鄧紫棋，佢全程扮晒嘢話唔係，去到最後一日去到富士急樂園，有其他香港人搵佢合照，團友先發現佢真實身份：「佢哋話係你你唔好唔認，佢哋唔知喺邊度搵咗本雜誌嚟，仲指出我粒癦，咁我就冇得唔認囉！」佢自爆其實未穿煲時幾搞笑，團友嘅媽咪話：「佢好似G.E.M.姐姐，不過G.E.M.姐姐肥啲同埋黐脷筋。」G.E.M.話當時好開心，因為證明咗佢唔係黐脷筋同埋真人好瘦！
場地：都會海逸酒店
Stylist：Emma Wallace
Makeup：Dora Chan assisted by Phoebe Ho (Spotlight Image）
Hair：Freddy Chiu
|
鍾意就快D Share啦！
|
|
|
