歌手謝安琪（Kay）日前誕下囡囡，老公張繼聰今日帶同仔仔張瞻陪老婆出院。阿聰在上午11時15分左右獨自落樓，笑言要「交人」會見新聞界，他表示太太還在病房收拾手尾，轉頭就會帶囡囡Karina落樓讓傳媒拍照，然後就回家。
同阿仔出世時一樣
接受訪問時，問到B女似邊個時，阿聰竟然話係似阿仔：「同阿仔細個一樣樣，依家過咗幾日啦，當然想佢似媽咪，冇咩嘢唔好似我輪廓開始愈嚟愈明顯，啱啱出世時就比較混沌啲，依家對眼就ok大，係雙眼皮！」佢又謂阿Kay都覺得同阿仔好似：「將佢哋一出世時嘅相做對比，係分唔到！」阿聰又指護士就覺得似阿Kay，特別係個嘴仔，而自己就覺得眼同鼻都好似媽咪，並謂最希望BB身體健康！
仔仔好溫柔
講到仔仔多咗個妹時感覺如何，阿聰透露仔仔過去幾日都有去醫院探媽咪同妹妹，而自己就忙開工，睇番啲片時就見到仔仔變咗大哥哥咁，好錫個妹，佢話：「阿仔抱住我個女好溫柔，初初我都好擔心唔知點，但見到佢好柔情，佢好溫柔叫妹妹：『唔好喊、唔好喊，哥哥喺度！』真係要生咗兩個先感受到，老懷安慰！」
唔會比較兩兄妹
問到他可有擔心仔仔會呷妹妹醋？阿聰說：「梗係驚，所以借呢個報道，同所有親戚朋友講，其實對小朋友，最好唔好講『你睇妹妹幾得意，妹妹得意過你喎，你食飯食快啲，唔係妹妹叻過你』呢啲係會令到小朋友覺得使唔使咁，都未出世就搶我位，所以我屋企冇人講呢啲，慢慢開始舖排到依家我個仔都好錫個妹，冇乜呷醋。（妹妹有冇送禮物畀哥哥？）梗係有，今年新年我個女（未出世）都有𢭃啲利是錢，我就將嗰啲利是錢，買咗小朋友好鍾意扭嗰啲足球卡、球星卡，買咗個Boxset話係妹妹送佢，我個仔都有交戲，佢話：『妹妹真係全世界最好嘅公主，真係多謝你！』轉頭就走去玩嗰啲卡，依家見到妹妹都好開心，希望佢兩兄妹感情會好，好得意㗎，我個仔喺我心裏面仲係BB，但見到佢抱住我個女，一個BB再抱另一個再細啲BB，係嗰種感覺令到我呢幾日返工好糾結，唔係好想返工，拍劇講台詞想講快啲，希望身邊同事又講快啲，好想快啲返醫院。」
|
鍾意就快D Share啦！
|
|
|
