上月慶祝67歲生日嘅薛家燕曾經許願，希望三個仔女早日成家立室，不足一個月，話咁快就願望成真，囝囝石耀庭本月中求婚成功！你估呢杯新抱茶真係咁易飲？捱到仔大女大有今日，家燕姐真係眠乾睡濕！如果，豆腐火腩飯係男人的浪漫，黯然銷魂飯，一定係薛家燕終身嘅浪漫。
周星馳電影《食神》中，家燕姐飾演嘅「味公主」拎住一碗只係加隻荷包蛋嘅叉燒飯，但時而食出哀傷， 忽爾吃得感動流淚，不禁會心微笑甚至狂喜。銷魂之所在，唔似得「爆漿瀨尿牛丸」只有一剎那爆漿嘅快感， 亦都唔似「超級無敵海景佛跳牆」有九九八十一種變化，只要簡簡單單，用心經營，即使係叉燒加隻蛋，一樣食出幸福味道。那些年被老公拋棄、被奶奶趕出門口，拖住三個仔女要擔驚受怕過日子嘅家燕姐，難關難過關關過，默默經營打造幸福的傳奇！家燕姐堅係單親媽媽嘅成功榜樣，今時今日身家過億珠光寶氣，隨手揀間2,000萬豪宅送畀囝囝，擺酒都話要擺三日，係咪勁先？
劇酬拍得住天王
早幾日我Nuts哥同笑到見牙唔見眼嘅準奶奶家燕姐High tea，講番當年前夫失蹤三年拋妻棄子，仲將所有物業資產轉晒名畀阿媽，奶奶趕埋四仔乸走，冇瓦遮頭，唔通要瞓街？家燕姐話當時諗住搵屋租，好女兩頭瞞，乜都唔敢同屋企人講，佢話：「點知有日我發現戶口多咗20、30萬，銀行經理去查，原來係爸爸入畀我！」薛爸爸深知個女含忍成性，默默送暖助渡難關！
落難嘅佢試過做保險，又曾經自薦做《婦女新姿》主持，點知對方以為佢仲係少奶奶玩玩吓，賺錢買Bra戴！之後無綫邀請家燕姐出山拍《真情》飾演「好姨」，佢話曾經因劇酬太低兼角色唔討好而十五十六： 「珍姐（曾勵珍）同陳寶華接見我，了解過我嘅情況， 二話不說酬勞加碼！幾多？總之可以媲美當時黎明嘅劇酬！」當時黎明已經係天王，拍咗《原振俠》同《今生無悔》等收視勁嘅劇集，可想而知，個價錢真係唔嘢小！復出嘅家燕姐乜都做，一日24小時當48小時咁用，冇司機、助手、經理人，自己一腳踢，收工返到屋企仲要睇仔女嘅功課，背劇本背到3點，6點又起身送仔女返學。咁樣捱法，佢曾經搞到開工期間冧廠，腹膜、胰臟同膽管都發炎，當時佢都做定最壞打算寫定遺囑，好彩大步檻過！
開學校搵滿足感
大半生只懂為仔女營營役役，離婚超過廿年，家燕姐仍然孤單一個，唔止仔女開到口叫佢搵番個伴，我Nuts哥當然都有問佢係咪想長守Dry缽！佢好真心咁話，一手創立嘅家燕媽媽藝術中心已經成為佢嘅寄託，可以為小朋友服務甚至幫助貧苦家庭嘅小朋友，當中嘅滿足感係買都買唔到！中心成立十三年以嚟，香港、內地同新加坡等地至今有十幾間分校，今年仲有十幾間集團邀請加盟，當中有唔少計劃喺內地大力發展， 嘩！容乜易搞埋上市，由家燕媽媽變為家燕主席？家燕姐即刻騎騎笑，話至少發展到20、30間學校先再算，當然都好想上市
明明傾開要搵個伴，唔好講咗去上市喎！講到感情，當年家燕姐正式離婚冇耐，有個聲稱身家過億、係前美國FBI 密探嘅追求者話要照顧佢一世，但佢見過鬼仲唔怕黑咩！不過，依家嘅佢就笑咪咪咁話已經有個心靈伴侶：「40、50歲時真係有諗過搵番個人，但好忙冇時間去培養。依家係有個細我十幾年嘅朋友，佢好關心我，好照顧我，有時都會送花畀我㗎！大家係心靈交流，成日會傾偈嘅朋友囉！」
|
鍾意就快D Share啦！
|
|
|
