梁思浩喺大台拍劇唔多，多數都係喺慈善騷同大台綜藝見過佢，梁思浩明顯唔旺無綫呢個場，2004年無綫大裁員，思浩係首批被叮走藝員，佢日前上ViuTV實況娛樂節目，又數歷史。回想當年仲喺大台工作嗰陣，思浩試過被榮休金牌監製李添勝揶揄，梁思浩爆料：「好出名監製捉我去後巷，佢話：『你知唔知我覺得你係乜嘢呀？垃圾呀!』」梁思浩憶述，當時添哥鬧佢唔識做戲、唔識讀對白，仲話「我都唔明點解你會紅!」佢話好彩當年畀添哥「點醒」，先至有今日。除咗添哥，梁思浩憶起已故「開心果」肥姐(沈殿霞)以前成日提攜佢，有一年肥姐邀請佢返屋企食團年飯，肥姐主動夾東坡肉俾佢，令佢感到家庭溫暖，仲感動到喊，自此每年一定到肥姐家拜年。直到，肥姐健康轉差嘅嗰年，肥姐一次過俾思浩10封利是，肥姐同佢講係俾梁思浩往後新年利是，跟住肥姐就離世。《蘋果》今日致電思浩，佢話：「我喺節目乜都講晒，其他唔再多講啦。」
來源 source: http://s.nextmedia.com
|
鍾意就快D Share啦！
|
|
|
