掃呢頁CODE去手機

2017年5月15日 星期一

西甲:西甲 C朗尼馬齊發威 皇馬巴塞同大捷 __,尼馬,基斯坦奴朗拿度,C朗,

西甲爭霸好睇過戲呀!咪以為講得好行貨,實則係皇馬同巴塞喺今季西甲爭霸,將會鬥到下周日最後一輪先分得出勝負,事關兩軍今晨(周日深夜)同樣以4比1擊敗對手 ...


西甲爭霸好睇過戲呀!咪以為講得好行貨,實則係皇馬同巴塞喺今季西甲爭霸,將會鬥到下周日最後一輪先分得出勝負,事關兩軍今晨(周日深夜)同樣以4比1擊敗對手。其中「銀河艦隊」憑住C朗取得個人喺皇馬第400個入波,帶領球隊大炒西維爾;至於「地上最強」則憑住尼馬大演帽子戲法,亦輕取拉斯彭馬斯。兩班波依家同得87分,皇馬仲有兩場喺手,巴塞只剩一輪但有對賽優勢,冠軍誰屬要等煞科日先知!

皇馬今場對住實力份子西維爾,先憑拿祖費南迪斯喺開賽10分鐘嘅快射罰球破網領先,事後搞到西維爾班球員圍住球證投訴,但未獲受理。13分鐘後,C朗近門執雞,射入佢喺皇馬第400個入球,幫球隊拉開紀錄到2比0。西維爾喺換邊後2分鐘憑祖維迪禁區外入波,追成1比2,帶起比賽小高潮。不過又係C朗發揮,喺78分鐘射入個人今場第2球,加上卻奧斯喺84分鐘埋齋,最後皇馬贏4比1。

巴塞方面,作客拉斯彭馬斯受到後防傷兵問題,連21歲小將馬朗山度士都獲得首次A隊正選機會。可幸實力超班嘅佢哋,上半場仲係憑住尼馬同蘇亞雷斯各入一球,領先2比0。守將比加斯喺64分鐘破關,幫主隊一度追成1比2,算緊湊番多少。不過巴塞巨星尼馬今場最堅,喺67同71分鐘再省兩粒,「地上最強」最後贏4比1全取3分。

賽後巴塞以37戰得87分續居榜首,皇馬就以36場得87分,因為對賽成績暫時屈居次席。巴塞最後一輪會係周日深夜主場對伊巴,皇馬則會先喺周三作客切爾達,然後煞科戰出訪馬拉加,兩場波只要拎到4分,就可以封王。

馬體會西維爾分定季殿 希杭正式降班

值得一提,西維爾今場輸波,將肯定以第4名結束球季,而直接取得歐聯分組賽資格嘅季軍位,就由今晨踢和貝迪斯嘅馬體會取得。至於護級形勢方面,希杭雖然以1比0打敗伊巴,但由於拉科魯尼亞亦以0比0守和維拉利爾,希杭因此正式宣布護級失敗,會隨同CF格蘭納達同奧沙辛拿齊齊下季乙組再見。


來源 source: http://hk.on.cc
鍾意就快D Share啦!