現年59歲嘅賈思樂(Louis)，人生經歷過好多高低起跌，面對摯親及至摯友離世，令他更懂得珍惜眼前人。賈思樂日前接受商台《1圈圈 星光背後》訪問，重提1988年，與藝人余綺霞、麥景婷、程思俊，以及當年無綫高層何麗全、金廣成同攝製隊一齊遠赴澳洲拍攝《歡樂今宵》外景，途中遇上嘅車禍。事隔29年，賈思樂仍猶有餘悸，佢話﹕「當時霞女(余綺霞)及收音師傷勢最為嚴重，我哋架車一翻轉，我喺車廂內聽到『啪、啪、啪』幾聲，整個過程好快，信教嘅我心裏面唸：『Oh God! Please make it stop!』之後我就昏迷。」賈思樂醒番之後，佢話第一眼見到嘅就係麥景婷，傷勢亦令佢好震驚，佢話﹕「佢左邊面上有一塊肉揭開咗，感覺以為佢死咗。當時我好驚，我怕車廂會爆炸，於是我慢慢爬出車，但背脊係痛到不得了，好辛苦先爬出車廂外，但係我已經冇辦法再走。抬頭見到好多煙，金廣成同何麗全都喺度叫『救命！』。幸好，啱啱有一部旅遊巴士經過，車上有一位外籍醫生同兩位護士立即落車幫我哋。」余綺霞車禍康復後，最終仍不敵癌病離世，令賈思樂更珍惜眼前人。不過，不幸嘅事喺95年再次發生。賈思樂當年因為去台灣宣傳，令他未能見到急病離世的媽媽最後一面，終生抱憾，更因自責及思念亡母致患上抑鬱症及暴食症，短短4、5個月暴肥30磅，幸身邊朋友及早發現。賈思樂說：「廖安麗親自嚟我屋企搵我，佢一開門就話：『點解你會變成咁？你有冇照鏡？睇吓自己呢個樣？』之後狄寶娜摩亞、關朝聰同陳玉蓮都有帶我去睇心理醫生，幸好及早治療，真係要多謝一班好朋友嘅照顧、支持同鼓勵！」可惜關朝聰35歲因病離世，令人不勝唏噓。
|
鍾意就快D Share啦！
|
|
|
