49歲歌手蘇永康（阿公）遲來得子，太太今年3月誕下「慈姑椗」蘇展弘（Jazz），現時弄子為樂的他竟忘記今日是父親節，阿公接受東網電話訪問時說：「因為家父過世好多年，係老婆話同我慶祝先猛然記起。」因蘇太前日起往歐洲公幹兩星期，一家三口特別提早在家中簡單慶祝，他說：「我同老婆都減緊肥，所以買咗個低卡路里嘅蛋糕仔，插支蠟燭加個氣球就算數。（想囝囝叫聲爸爸做父親節禮物？）叫媽媽先！媽咪辛苦啲！」問到有何父親節願望？阿公坦言全家健康便夠，見兒子已變成「Amazing B」，幾個月大但在扶實下已能腳踏實「髀」，為父者已大滿足：「佢可以『企』得好穩㗎喇！」
談及三個月來邊工作邊湊B的日子，阿公認為開心比辛苦多，近日還發生兩件心甜事！他指一直負責餵Jazz食夜奶，有晚因在台北做騷太攰而唔知醒，最後由太太代勞，第二朝瞓醒時發覺Jazz全晚睡在他身邊：「老婆冇抱番去BB床，嗰晚係第一次三仔乸一齊瞓，雖然瞓着咗但諗番起個心好甜！阿仔平時瞓覺好似打功夫咁郁手郁腳，但嗰晚冇嘈冇郁過，好似知我攰，識孝順老竇咁！太太呢排唔喺屋企，我諗住晚晚都陪仔瞓。」
講Bye即扁嘴爆喊
另一次則是當阿公與太太及兒子玩FaceTime時，原本「傾」得好開心，但當他一講「Bye Bye」時，Jazz立即扁嘴爆喊，阿公話：「佢好似唔捨得我咁！原來佢唔係只錫媽咪。（想立即回家？）如果仲有夜機，立即『掹』（走）」囝囝出世後，阿公坦言「世界變」，曾揚言不會因BB而減退對時裝的熱情，但早前往日本時竟用一整天買童裝：「以前叫我唔好買衫睬你都傻，依家我畀人講中晒，只記得買BB衫。」
細細個揀聽陳百強的歌
阿公又指囝囝深得他遺傳愛聽已故偶像陳百強的歌，他說：「陳百強啲歌全首聽晒，我啲歌就藐藐哋，呢啲係有taste呀。」
|
鍾意就快D Share啦！
|
|
|
