王君馨處女解放心急擒老公
王君馨（Grace）前日於美國與圈外男友Daniel低調舉行婚禮，「處女黨」前成員鍾嘉欣、李亞男做姊妹Rap歌送嫁，與「處女黨」脫鈎的Grace在婚禮上大解放，除猴急地坐老公大髀high到爆外，還在婚禮翌日在社交網站高調宣布正式成為章太，留言冧爆老公：「和你一起，是我人生最大的福分！」實行來一招「人妻放閃」！
現年31歲的王君馨去年入紙排期跟拍拖接近12年的圈外男友Daniel註冊結婚，二人於紐約時間6月11日舉行婚禮，「處女黨」前成員鍾嘉欣、李亞男傍實陪嫁，而衛蘭、裕美等更專程飛到當地參加婚禮，Grace另一好友苟芸慧則有工作在身，未有前往參與。Grace先穿上中式裙褂與李亞男、前來觀禮的衛蘭及裕美合照，大晒姊妹情！其後換上一襲Deep V純白婚紗，挽住爸爸步入教堂，與Daniel齊齊接受來賓的祝福！
變樹熊攬夫
整個婚禮過程既溫馨又感動，不少嘉賓都被感動到喊，一對新人當然感動又開心，行禮後舉行婚宴，席間播放Grace選美及與Daniel拍拖的相片，全場嘉賓歡呼大叫。正式脫離「處女黨」的Grace於婚宴上大解放，全程開心得滿場飛，期間更一度「樹熊式」坐上老公大髀，再用手機反拍兄弟們，High到爆。而好姊妹鍾嘉欣及李亞男齊齊獻聲Rap歌，亦令整個婚禮生色不少。
忙完婚禮的Grace回氣後即向大家報喜，她接受訪問時開心分享喜悅：「我喺紐約嘅6月11日同Daniel結咗婚啦，好嘢，哈哈！」更大爆鍾嘉欣做伴娘之餘，原來連大妗姐都撈埋，認真唔話得！Grace說：「非常之開心，朝早一班姊妹幫我着褂，我哋亦有斟茶畀父母，嘉欣除咗係maid of honor（伴娘），仲做咗我嘅大妗姐，因為我冇大妗姐。」
綵排喊定先
Grace感謝一班姊妹十分有心，特別作歌再以Rap形式即場獻唱祝賀，Grace說：「佢哋好sweet，準備咗十分鐘嘅Sharing，同埋加咗Rap歌，Rap咗好Sweet嘅詞畀我同我老公仔。」問到有否感動落淚？Grace笑言：「因為綵排時已經喊咗，所以到正式嘅時候就忍得住冇喊到。」問到何時度蜜月？她說：「我依家會休息一陣先，7月11日（前）會返嚟香港搞香港婚宴。」
未知是否婚宴玩得太盡興，Grace昨日聲音疲憊地接受無綫《東張西望》訪問，自爆老爺奶奶送了廿萬首飾給她，亦談到鍾嘉欣做大妗姐的箇中原因：「因為我斟茶嘅時候先發現原來要有大妗姐幫手，當時好愕然，大家你眼望我眼，好彩嘉欣人急智生，記番之前佢結婚當日斟茶時聽嘅吉利說話講番出嚟，咁我哋就成功斟茶。」Grace又指整個婚禮都很感人，亦未見過丈夫如此感動。
文：影視組
|
鍾意就快D Share啦！
|
|
|
