大台節目《關你家事》，顧名思義，將人哋啲家事擺上枱，再畀啲現場觀眾、專家，甚至主持人嚟「參與」畀意見，但正所謂「清官難審家庭事」，美其名係想點出時下家庭欠缺溝通，造成不和嘅情況，但實質係成棚陌生人一齊嚟「搞和諧」，難怪節目截至9號下晝5點，通訊局已經收到共16宗投訴。（新聞連結： http://bit.ly/2tcwFWa ）前晚嗰集搵嚟Cady——即係黃宇詩個男友彭慶餘（Peter）個前妻，上節目講第三者呢個話題，Cady前晚講到聲淚俱下咁，話自己發現老公有第三者，有嘗試去溝通，仲話最擔心婚變會影響到自己3個仔女，又遇着啲仔女反叛期，唔知點處理。到咗噚晚，Cady喺節目坦言當初有諗過報復，但最後冇做到，而節目預告講Cady想點樣修補同仔女之間嘅關係，但播出時，Cady冇太實質提到佢打算點樣修補同仔之間嘅關係嘅方法，反而係被讚o依家佢向前看，有個同佢同樣離過婚嘅男友，大家差唔多經歷，再有班專家教講面對婚變嘅情緒處理，就係唔好對啲仔女數前夫/前妻嘅不是。Cady再分享咗遇上婚變，應該要處理咗自己嘅情緒先。然後，到咗「最緊要」嘅谷淚時間，主持人問Cady知唔知個大女想點，然後話原來佢大女最想Cady同前夫可以和平、平心靜氣坐低傾，唔好一見面就嗌交，同埋無論Cady點勞氣都好，都唔好講啲傷害小朋友嘅說話，仲話做父母嘅可能講咗啲傷害仔女嘅說話，講嗰個冇心記住，聽嗰個記入心，就係咁，父母同子女之間就開始溝通唔到。到節目尾，Cady眼濕濕咁話好少父母會同仔女道歉，end up佢就流住兩行眼淚咁望住鏡頭、誠心向個女道歉。
| （電視截圖） | | |
| | | |
| | | |
|
鍾意就快D Share啦！
|
|
|
