淡出幕前教氣功 鄭少秋：梗係難過！
鄭少秋：唔知呢件事！聽到梗係好難過，以前一齊合作咁多劇集，早排佢仲有教人氣功，聽講話幾好，有武指話學咗都幾好添！
黃杏秀：曾經同歐陽佩珊合作過電視劇，但就冇對手戲。對上一次見面大約係30多年前嘅事，之前訓練班嘅同學張美琳過咗身，冇耐又聽到歐陽佩珊嘅死訊，覺得好愕然。
羅蘭：同歐陽佩珊合作過好多劇集，一時間都講唔起劇名，我哋演過母女，印象中歐陽佩珊對工作好認真。
黃淑儀：麗的時代已與歐陽佩珊見過面，我哋先後加入TVB，算係前後腳，我入去時佢都差唔多離開。
魯振順：我係跟歐陽佩珊學氣功，當年郭鋒介紹認識，因為覺得自己身體唔強壯，鋒哥話唔介意可以跟歐陽佩珊學氣功。印象中佢係一位注意養生嘅人，所以當聽到佢離世嘅消息都唔敢相信，一個咁追求健康養生嘅氣功師咁樣走咗。歐陽佩珊為人好嚴謹，而鋒哥對佢好尊重。
梁家仁：呢個消息真係令我好震驚同可惜，當年大家拍完《神鵰俠侶》之後都冇見過面。
賈思樂：收到消息好愕然，好難接受！我跟佢學過氣功，大概學咗十堂後就自己練，佢都話氣功係易學難精，叫我自己畀心機練。
林漪娸：聽到都好Sad，因為冇聽過佢有病，印象中佢係一個好好嘅老師，之前聽到有個圈內人中風，個嘴歪咗都係佢針灸好番。現階段唔會打擾郭鋒，等佢遲啲定晒所有嘢先。
甘國亮：我哋喺《執到寶》飾演兩姊弟，佢個人好爽直，唔似得有啲女演員會斤斤計較，佢一點都唔會咁，好有男兒風，好似佢離開娛樂圈都係好撇脫，唔會戀棧，呢一點好獨特。
來源 source: http://orientaldaily.on.cc
|
鍾意就快D Share啦！
|
|
|
