不老石修，睇唔出已經68歲，阿仔陳宇琛又啱啱結婚，真係喜事重重，不過，原來多年來體格強健嘅石修，喺後生嘅時候，染上一個怪病，醫生仲話係無得醫。
早前石修接受商台《1圈圈 星光背後》訪問，就爆咗佢上一個世紀，80年代拍《楊門女將》前，突然患上消化系統怪病，佢話：「到o依家都唔知病因，就是胃部忽然失去消化能力，乜嘢消化唔到，嗰陣我食一條菜，就會原條排出體外。我喺一個月內，體重由150磅跌到得105磅，行步路都冇力。」
嗰陣石修同太太遍尋名醫，食咗好多都醫唔好，仲一度好絕望，想放棄再醫，點知「救命恩人」突然出現，呢個就係「秋官」鄭少秋，唔通秋官係隱世名醫？石修就話：「呢啲真係緣份，有一日阿秋同我講：『阿修！我喺九龍仔公園識一個太極師傳，佢好犀利，不如我哋去試吓！』阿秋帶我去搵嗰個師傅。」
「阿秋真係好好，你知道嗰陣佢有幾忙？佢陪咗我一個禮拜，每朝早上六點幾就帶我去耍太極。然後真係好神奇！耍咗一禮拜太極，全身關節都變暖，食慾又開始增多，慢慢開始回復消化能力。三個月後，嗰個怪病現象就唔見咗！」自此之後石修一直視秋官為救命恩人。
石修喺戲行60年，講到緋聞真係少之又少，之不過嗰陣咁多靚女花旦，汪阿姐呀、趙雅芝、黃淑儀、李司棋呀！點會唔心動呢？佢話：「其實係有誘惑，人有感情，特別喺演戲嘅時候，你長期對住對手，係會出現假象，會唔小心向對方投入感情。但係如果同對手冇呢個感覺，戲就會好難演，所以是一定係有假愛情。我自己識得處理，因為同呢個對手拍完一部戲，好快會拍下一個，對上一個感情就會淡，跟住再出現下一個假象，咁多年以嚟冇緋聞，證明我可以抽離。」而正正係咁樣，石修19歲時歲認識當年14歲嘅太太，拍拖九年結婚，太太又陪佢面對咁多難關，所以情比金堅，到o依家都仲係好恩愛。
| 右圖：《楊門女將》劇照 | | |
| | |
|
鍾意就快D Share啦！
|
|
|
